«ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի նախագծի քննարկման ժամանակ ՀԱԿ խմբակցության պատգամավոր Նիկոլ Փաշինյանը նշեց, թե «1000 դրամների օրենքը» քննարկում են այն պայմաններում, երբ հազարավոր զոհված կամ հաշմանդամ դարձած ազատամարտիկների և զինծառայողների ընտանիքներ գտնվում են սոցիալապես ծանր պայմաններում, իսկ բազմաթիվ հիմնադրամներ ու անհատներ օգնություն են հավաքում այդ ընտանիքներին օգնելու համար:
«Շուտով Նոր տարի է, և մենք կտեսնենք 5 հատ լիմոնադ, 7 հատ լավաշ, 12 բլինչիկ և ամեն բլինչիկի համար հինգ րոպեանոց գովազդային ռեպորտաժներ տարբեր լրատվամիջոցներով: Այս քննարկվող նախագծով մենք շանս եք ստանում սկսել գտնել պրոբլեմի ինստիտուցիոնալ լուծումը, սակայն դժվար է ասել՝ կօգտագործե՞ն շանսը: Հայրենիքի համար զոհված կամ հաշմանդամ դարձած երեխաները կազատվեն Սոցապնախարարության ընդունարաններում կամ օլիգարխների դռների տակ օրեր անցկացնելուց»,- ասաց պատգամավորը՝ հույս հայտնելով, որ հետագայում այս կառույցը կմեծանա և կտարածվի նաև մինչ հունվարը կատարված դեպքերի վրա:
Նիկոլ Փաշինյանն անհերքելի փաստ համարեց, որ իշխանությունը կոռումպացված է և թալանչի, սակայն ընդգծեց, թե համակարծիք չէ, որ այս փաստարկով կարելի է օրենքին դեմ քվեարկել։
«Այսինքն՝ զոհված զինծառայողի երեխայի ուսման վարձը մուծել չկարողացող երեխային մենք ասում ենք՝ բալի՛կ ջան, քանի որ իշխանությունը թալանչի է, քո հայրն էլ մեր չափ խելք չի ունեցել, գնացել է՝ հայրենիքի համար զոհվել, ուրեմն՝ գնա օլիգարխների գովազդային կլիպներում մանեկենություն արա, կամ էլ օրերդ անցկացրու գերատեսչությունների դռների տակ, մինչև մենք կանենք իշխանափոխություն, ինչպես անում ենք արդեն 20 տարի՝ գարուն, աշուն, ձմեռ և այլն»,- ասաց Ն. Փաշինյանը:
Երբ Նիկոլ Փաշինյանը փորձում էր հիմնավորել, թե ինչու է կողմ այս նախագծին՝ ասելով, թե 1000 դրամները իշխանությանը չենք տալիս, տալիս ենք զինվորների ընտանիքին, տեղից սկսեց բղավել «Ժառանգություն» կուսակցության պատգամավոր Զարուհի Փոստանջյանը. «Սուտ ես ասում, ոչ, էդպես չի, չի կարելի այդպես ասել… դու շատ լավ գիտես՝ ուր են գնալու այդ գումարները, Սերժի գրպանն է գնալու այդ գումարները… »:
«Թույլ տուր՝ բացատրեմ,- նշեց Ն. Փաշինյանը: – Կոպիտ փաստեր եմ ասում՝ մարդը զոհվե՞լ է, զոհվել է, հաշմանդա՞մ է դարձել, դարձել է… »:
«Չկա մի ուժ, որ ստիպի ինձ հակառակն անել, ես կողմ եմ այս նախագծին: Մեր բանակը բարեգործության, կարեկցանքի օբյեկտ չէ»,-ընդգծեց Ն. Փաշինյանը:
Մանրամասները՝ տեսանյութում:
