«Մենք ինչից էլ խոսենք, ինչ քննադատություն էլ անենք, իշխանությունը մեզ կշտամբում է, որ մենք զբաղված ենք նախընտրական քարոզչությամբ: Չգիտեմ՝ ինչու են նման եզրակացության եկել, բայց 2012թ-ից սկսած, ինչ մուտք ենք գործել ԱԺ, մենք նույն գործով էլ շարունակում ենք զբաղվել՝ նույն քննադատությունը, չարաշահումների բացահայտումը, առաջարկները…»,- այս մասին ԱԺ ճեպազրույցների ժամին ասաց ՀԱԿ խմբակցության ղեկավար Լևոն Զուրաբյանը:
Լևոն Զուրաբյանը խոստումներ տվեց, որ եթե ՀԱԿ-ն ընտրություններում հաղթի, դրանք կիրագործվեն՝ շեշտակի կբարձրացնեն կենսաթոշակները, գազի և էլեկտրաէներգիայի սակագինը 25%-ով կնվազի, իրենք գյուղացիների համար վարկային ամնիստիա կմտցնեն և նրանց ուսերից կթոթափեն այն բեռը, որ անտանելի է դարձրել նրանց կյանքը: Հարկերն կպարզեցնեն՝ 14 հարկատեսակից թողնելով 5-ը, իսկ եղածի դրույքաչափն էլ, առնվազն, կհասցնեն Վրաստանում գոյություն ունեցող մակարդակին:
«Մենք վստահ ենք, որ այս մեր կատարված բարեփոխումների արդյունքում, որի մեջ մտնում է մենաշնորհների վերացումը, ՀՀ-ում մրցակցային վիճակ կլինի, կապիտալի ներհոսք, ստվերը ոչ թե ադմինիստրատիվ ճնշումներով, այլ կամովի դուրս կգա, ինչը կնշանակի, որ շեշտակիորեն կավելացնենք բյուջեի եկամուտները»,- ասաց Զուրաբյանը՝ հավելելով, որ որոշակի անակնալ-ուղերձներ կհնչեցնեն դեկտեմբերի 17-ին կայանալիք ՀԱԿ համագումարին։
ՀԱԿ պատգամավորը նշեց, որ Կարեն Կարապետյանը Գյումրիում հայտարարեց, թե ՀՀ-ում չկա մենաշնորհ: «Ես էլ հիմա կարող եմ հայտարարել, որ ՀՀ-ում չկա Կարեն Կարապետյանի կառավարությունը, ինձ կհավատա՞ք, չեք հավատա, չէ՞, բա ինչու մենք պետք է հավատանք նման պնդումներին»,-ասաց Զուրաբյանը: -Գլխավոր տրյուկն այն է, որ իշխանությունները ընտրություններից առաջ փորձում են ռեժիմի մարդկային դեմք ստեղծել, կառավարությունից հեռացրել են օդիոզ ֆիգուրներին, փորձում են շատ քիչ էժանացումներ անել… և այս ամենը արվում է մեկ նպատակով, որ դրական զգացումներ ստեղծեն սոցիալական դժգոհություն ունեցող բնակչության մոտ, «հորով-մորով» անեն ընտրությունները, հետո էլ անցնեն «ավանդական գործին»:
Մանրամասները՝ տեսանյութում:
