Գերմանիայի և Ռուսաստանի արտգործնախարարներ Ֆրանկ-Վալտեր Շտայնմայերը և Սերգեյ Լավրովը Համբուրգում հանդիպման ընթացքում քննարկել են իրավիճակը Հալեպում։ Այս մասին հայտնում է RIA Novosti-ն՝ հղում անելով գերմանական պատվիրակության աղբյուրին։
Նրա խոսքով՝ Լավրովի հետ զրույցի ընթացքում քննարկվվել են «ակտուալ հարցեր, առաջին հերթին իրավիճակը Սիրիայում և Հալեպում, ինչպես նաև Եվրոպայում անվտանգության, կայունության և խաղաղության հարցերը»։ Նա նաև նշել է, որ զրույցը եղել «տևական ու լուրջ»։
Բացի այդ, ինչպես հավելել է աղբյուրը, կողմերն ինտենսիվ քննարկել են սպառազինությունների նկատմամբ վերահսկողության, Ուկրաինայում տիրող իրավիճակի և ԵԱՀԿ տարածքում տնտեսական համագործակցության թեմաները։
Շտայնմայերը զրույցի ժամանակ հայտնել է Հալեպում կրակի անհապաղ դադարեցման, մարդասիրական հասանելիության բացման և քաղաքական երկխոսության վերսկսման անհրաժեշտության մասին։
Լավրովը Հալեպում տիրող իրավիճակը քննարկել նաև ԱՄՆ պետքարտուղար Ջոն Քերիի հետ։ «Նրանք քննարկել են բազմակողմ ջանքերը՝ ուղղված Հալեպում կրակի դադարեցման հասնելուն և Սիրիայում տասնյակ հազարավոր քաղաքացիական անձանց մարդասիրական օգնության մատակարարմանը, ովքեր դրա խիստ կարիքն ունեն»,-հայտարարել է Պետդեպի ներկայացուցիչ Ջոն Կիրբին։
Քերիի հետ հանդիպումից առաջ Լավրովն ընդգծել էր, որ Ռուսաստանն աջակցում է Հալեպի հարցով ԱՄՆ-ի՝ դեկտեմբերի 2-ի նախաձեռնությանը, որը վերաբերվում է Հալեպի արևելքից գրոհայինների դուրսբերմանը։
