Կարեն Կարապետյանն այսօր՝ դեկտեմբերի 7-ին, Գյումրիում էր: Սա նորանշանակ վարչապետի առաջին այցն էր Գյումրի: Նախորդ վարչապետը Գյումրիում խոստացել էլ 500 աշխատատեղ բացել և 300-ը կարողացել էր բացել, իսկ այս վարչապետը խոստումներ չտվեց: Եվ ի վերջո պարզ չդարձավ, թե աղետի գոտին երբ կդադարի աղետի գոտի համարվել, և խնդիրները երբ կլուծվեն:
«Առաջին լրատվական»- ի հետ զրույցում, անդրադառնալով այս դիտարկմանը, Շիրակի թեմի առաջնորդ Միքայել Արքեպիսկոպոս Աջապահյանը նշեց. «Իմ հանդիպումը վարչապետի հետ կարճատև էր: Ես ուրախ եմ, որ այս վարչապետը չի շտապում խոստումներ շռայլել, այլ փորձում է առավելագույնս լինել պրագմատիկ և իրատեսական: Թե որքանով դա կհաջողվի, ցույց կտա ժամանակը: Ամեն վարչապետի փոփոխության հետ կապված՝ միշտ եղել եմ լավատես: Եվ չի կարելի ասել, թե ոչ մի վարչապետ ոչ մի բան չի արել, արվածը միշտ եղել է անբավարար, որովհետև կարիքը շատ մեծ է: Երանի այն վարչապեին, որի օրոք այս էջը կփակվի: Այս վարչապետի հետ կապված նաև մարզային և քաղաքային իշխանություններն են լավատեսորեն տրամադրված, որ նա փորձում է ռեալ մոտենալ հարցին և ռեալ լուծումներ առաջարկել, և միայն այդ ժամանակ հրապարակել այդ մասին, ոչ թե տեսական խոստումներ է տալիս:
Անդրադառնալով վարչապետի՝ ՀՀԿ-ին անդամագրվելու փաստին՝ Միքայել Արքեպիսկոպոս Աջապահյանը նշեց, որ վարչապետը հանգամանքի բերումով, իր պաշտոնի բերումով դարձավ ՀՀԿ անդամ. «Չի կարող պատասխանատվություն ստանձնել և չլինել իշխանություն ունեցող կուսակցության անդամ, ինչ-որ տեղ հասկանալի է»:
Ինչ վերաբերում է համատարած հանրապետականացմանը, ապա, Աջապահյանի խոսքով՝ միշտ էլ այդ գայթակղությունը կա, և իշխող կուսակցության մեջ ամեն պատահական մարդ մտնում է. «ՀՀԿ-ն հենց որ դարձավ իշխանություն, բոլոր պատեհապաշտները հավաքվեցին այնտեղ: Որ կուսակցությունն էլ գա իշխանության, բոլոր պատեհապաշտները վազելու են այնտող, և որևէ կուսակցություն չունի այն ֆիլտրող մեխանիզմը, որի միջոցով կարողանա պատեհապաշտներից ազատվել կամ թույլ չտա լցվել այնտեղ»:
Անդրադառնալով հարցին, թե արդյո՞ք Հանրապետական կուսակցությունն ունի փոխվելու անհրաժեշտություն, Սրբազանը պատասխանեց. «Անշուշտ: Ցանկացած իշխող կուսակցություն ենթական է փչացման… Կոմունիստական կուսակցությունը փչացավ, ՀՀՇ-ն փչացավ, հիմա հերթը ՀՀԿ-ինն է: ՀՀԿ-ն լուրջ կերպով փչացած է: Կարծում եմ՝ նախագահն էլ, վարչապետն էլ, կարևոր դեմքերն էլ հասկանում են, որ իրենց կուսակցությունը լուրջ ճգնաժամի մեջ է: Շատ իմաստուն, խոհեմ և հայրենասեր պետք է լինել այդ նեխվածությունը կանխելու համար»:
Մանրամասները՝ տեսանյութում:
