Համաշխարհային շուկայում թանկարժեք մետաղներն էժանանում են: Այս տարվա հունիսին ոսկու համաշխարհային գինը նույնիսկ իջել էր մինչև 1199 դոլար՝ մեկ տրոյական ունցիայի դիմաց: Գնանկումը նկատվում է նաև մյուս թանկարժեք մետաղների` արծաթի և պլատինի շուկայում:
Այս համատարած գնանկումն, ամենայն հավանականությամբ, պայմանավորված է, աշխարհի երկու խոշոր տնտեսություններում` ԱՄՆ-ում և Չինաստանում նկատվող դրական միտումներով: Իրավիճակը, կարծես թե, կայունանում է նաև եվրոգոտում: Եվ այս պայմաններում ներդրողները սկսել են ուշադրություն դարձնել իրական ակտիվներին, իսկ թանկարժեք մետաղների նկատմամբ պահանջարկի անկումը հանգեցրել է գնանկման:
Սա շղթայական ռեակցիայով կազդի նաև մեր տնտեսության վրա: Հայաստանի տնտեսության համար հատկապես կարևոր է ոսկու և պղնձի գների դինամիկան: Մեր տնտեսության համար, պարզ լեզվով ասած, ձեռնտու է ոսկու էժանացումը, բայց պղնձի` թանկացումը, քանի որ Հայաստանի արտահանման կառուցվածքում պղնձի հանքաքարի բաժինը բավական մեծ է:
Եվ ամեն ինչ, կարծես թե, հենց այս սցենարով էլ գնում է: Եթե հետևենք ոսկու գների դինամիկային, ապա տարեսկզբից այն անընդհատ էժանանում է, և այժմ մեկ տրոյական ունցիայի գինը տատանվում է 1310 դոլարի մոտակայքում: Էժանացման դինամիկան կպահպանվի, եթե պահպանվեն նաև համաշխարհային տնտեսության կայունացման միտումները, և դրանից Հայաստանի տնտեսությունը միայն կշահի` բոլոր առումներով:
Ինչ վերաբերում է պղնձի գներին, ապա այստեղ իրավիճակը շատ ավելի փոփոխական է: Այս տարվա ամենացածր գինը սահմանվել է հունիսի երկրորդ կեսին` 6695.5 դոլար՝ մեկ տոննայի համար: Հետո գները սկսել են նորից բարձրանալ, և հուլիսի 29-ին հասել են մինչև 6708.7 դոլարի՝ վերջին անկումից ի վեր: Այժմ մետաղի մեկ տոննայի գինը 7288.5 դոլարի մոտակայքում է: Ինչպես արդեն նշեցինք, այստեղ Հայաստանը կշահի միայն թանկացումից:
Եթե հուլիսի վերջից սկսված պղնձի գնաճը պահպանվի, ապա կավելանան արտահանման ծավալները, ձեռնարկությունների շահութաբերությունը, աշխատողների աշխատավարձերը և հարկային մուտքերը: Որքա՞ն կշարունակվի Հայաստանի համար հուլիսի վերջից ստեղծված այս շահավետ իրավիճակը, այսինքն` որքա՞ն ժամանակ ոսկին կշարունակի էժանանալ, իսկ պղնիձը՝ թանկանալ. սա կախված է Չինաստանում, Եվրոպայում ու ԱՄՆ-ում տնտեսական միտումներից:
