Քանի դեռ Կառա Դելվինը կորցնում է իր պայմանագրերը վատ սովորությունների պատճառով, մեկ այլ մոդել՝ 21-ամյա Կառլի Քլոսը կարող է իր աշխատանքից զրկվել չափազանց հայտնի լինելու պատճառով: Դիզայներները որոշել են մոդելին աշնանը կայանալիք ցուցադրություններին չհրավիրել՝ պատճառաբանելով, որ հանդիսատեսի ամբողջ ուշադրությունն ուղղված կլինի աղջկան, այլ ոչ թե նրա հագուստին:
21-ամյա Կառլիի կարիերայի զարգացմանը կարող են շատերը նախանձել: Նա պոդիում է բարձրացել 14 տարեկան հասակում, իսկ 15-ում արդեն գործակալության հետ ստորագրել է իր առաջին պայմանագիրը: Երբ Կառլին 16 տարեկան է դարձել, ամերիկյան People ամսագիրը նրան տարվա մոդել է անվանել: Ֆրանսիական Vogue-ը նրան ներառել է 2000-ականների 30 լավագույն մանեկենուհիների ցուցակում, իսկ հեղինակավոր models.com պորտալը, որը հայտնի է իր վարկանշային աղյուսակներով, նրան լավագույն 15 մոդելների շարքում 3-րդ տեղն է հատկացրել:
2011 թ., երբ Կառլի Քլոսը 19 տարեկան էր, նա դարձավ Victoria’s Secret-ի հրեշտակներից մեկը:
Բացի գովազդային արշավներում նկարահանվելուց և ցուցադրություններին մասնակցելուց, նա հեռուստաշոու է վարում, իր անունով թխվածքաբլիթներ և ջինսերի հավաքածու է թողարկում, պարբերաբար հայտնվում է կարմիր գորգերի վրա և մասնակցում է տարբեր երեկույթների:
