Այսօր լրանում է Ֆրանսիական երգի աշխարհահռչակ շանսոնյե, կինոդերասան և հասարակական գործիչ Շառլ Ազնավուրի 87 ամյակը։ Ազնավուրով հիանում և հպարտանում է ամեն հայ՝ նրա կյանքը համարելով հայ ազգի տոկունության, վերածնվերու առանձնահատկության օրինակներից մեկը։ Աշխարհահռչակ հայը ծնվել է 1924 թվականին Մեծ Եղեռնից հետո Փարիզում հայտված հայ գաղթականների ընտանիքում:
Մանկուց սիրել է արվեստը, արդեն 9 տարեկանում խաղացել թատրոնում, իսկ 1940-ական թթ. Պիեռ Ռոշի հետ հանդես է եկել կաբարեում։ 1956 թվականին շանսոնյեն համերգներ է տվել ֆրանսիական ամենահայտնի «Օլիմպիա» համերգասրահում։ Այս հաջողությանըից հետո շանսոնյեն հյուրախաղերով հանդես է եկել նաև Նյու Յորքում և սիրվել նաև ամերիկացի հանդիսատեսի կողմից։
Շարլ Ազնավուրը շուրջ ութ հարյուր երգի հեղինակ է։ Ազնավուրի հեղինակած հիթերը կատարել են նաև Էդիտ Պիաֆը, Լայզա Մինելին, Մստիսլավ Ռոստրոպովիչը, Պլաչիդո Դոմինգոն, Ջո Դասենը, Ռեյ Չարլզը և այլ աշխարհահռչակ երգիչներ։
Ամերիկյան «Թայմ» հանդեսի հարցման համաձայն Ազնավուրը ճանաչվել է «Դարի արվեստագետ»։ Արժանացել է Հայաստանի և Ֆրանսիայի բարձրագույն պետական պարգևներին, «Պատվո սեզարի» (1997)։
Ազնավուրը միշտ հպարտանում է իր հայկական ծագմամբ, և ամեն կերպ սատարել է Հայաստանին, օգտագործել իր համաշխարահային ճանաչումն ու հեղինակությունը՝ օգնելու հայրենիքին։ 1988-ի ավերիչ երկրաշարժից անմիջապես հետո հիմնադրել է «Ազնավուրը Հայաստանին» բարեգործական հիմնադրամը, կազմակերպել հանգանակություններ, 90 ֆրանսիացի երգիչների ու դերասանների մասնակցությամբ ձայնագրել «Քեզ համար, Հայաստան» հայտնի տեսահոլովակը։ Ազնավուրը նաև Հայաստանի մշտական դեսպանն է ՅՈՒՆԵՍԿՈ-յում։
Գյումրիում կանգնեցված է Ազնավուրի արձանը, նրա անունով է կոչվում Երևանի կենտրոնական հրապարակներից մեկը։ 2008 թվականի դեկտեմբերից Ազնավուրը Հայաստանի Հանրապետության քաղաքացի է, իսկ 2009թ.-ից ՝ Հայաստանի արտակարգ և լիազոր դեսպանն է Շվեյցարիայում և Հայաստանի մշտական ներկայացուցիչը ՄԱԿ-ում։
