Միացյալ Նահանգները ընդմիջում կվերցնի Ռուսաստանի հետ փոխհարաբերություններում՝ քննարկելու համար՝ ինչ կարելի է անել դրանք բարելավելու համար: Այս մասին Սպիտակ տանը մամլո ասուլիսի ժամանակ հայտարարել է ԱՄՆ նախագահ Բարաք Օբաման:
Նա հիշեցրել է, որ «Խորհրդային Միության անկումից հետո ռուս-ամերիկյան փոխհարաբերություններում միշտ տարաձայնություններ են եղել»:
Օբաման ընդգծել է, որ իր պաշտոնավարման առաջին ժամկետում երկկողմանի հարաբերություններում զգալի առաջընթաց է նկատվել: Նա, սակայն, կարծում է, որ երբ Վլադիմիր Պուտինը վերադարձավ նախագահի պաշտոնին, «Ռուսաստանում մեծացավ հակաամերիկյան քարոզչությունը, որը նպաստեց որոշ հին կարծրատիպերի պահպանմանը՝ «սառը պատերազմի» ժամանակներից ի վեր»:
Օբամայի խոսքով՝ վերջին ամիսների ընթացքում երկու երկրների միջև առաջացել են մի շարք հակասություններ, այդ թվում նաև այնպիսի խնդիրներ, ինչպիսին Սիրիայի իրավիճակն է և մարդու իրավունքները: Հերթական հակասության պատճառ դարձավ նաև ՌԴ-ի՝ Էդվարդ Սնոուդենին ժամանակավոր ապաստան տրամադրելը:
«Այդ պատճառով էլ, հնարավոր է, մենք պետք է դադար տանք՝ հասկանալու համար, թե ուր է շարժվում Ռուսաստանը և ինչ է պատասխանում մեր շահերին: Դա պետք է նաև այն բանի համար, որ երկկողմանի հարաբերությունները լավը լինեն ԱՄՆ-ի, և հույս ունեմ, նաև Ռուսաստանի համար»,- ասել է Օբաման:
Ինչ վերաբերում է Օբամայի և Պուտինի անձնական հարաբերություններին, ԱՄՆ նախագահն ասել է, որ, ի հեճուկս որոշ պնդումների, «դրանք վատը չեն»: «Հաճախ դրանք կառուցողական են լինում: Ես գիտեմ, որ լրագրողները սիրում են ուշադրություն դարձնել այն բանին, թե ինչպես են իրենց պահում քաղաքական գործիչները, և երբեմն թվում է, որ Պուտինը նստած է ինչպես հոգնած աշակերտը՝ դասարանի վերջին նստարանին: Սակայն իրականությունն այն է, որ մեր քննարկումները հաճախ են արդյունք տալիս»,- ընդգծել է Օբաման:
ԱՄՆ-ը նախագահն ասել է, որ չնայած հետաձգել է իր այցը Մոսկվա, սակայն կմասնակցի Սանկտ Պետերբուրգում կայանալիք G20-ի գագաթնաժողովին:
Օբաման նաև ճիշտ չի համարում Սոչիի օլիմպիադան բոյկոտելու գաղափարը, հաղորդում է Apsny.ge-ն:
