Տնտեսագետ Վիլեն Խաչատրյանն ու Իրավաբանների և հոգեբանների միջազգային ասոցիացիայի նախագահ Խաչատուր Մարոզյանն այսօր լրագրողների հետ խոսեցին մոնոպոլ իրավունքի մասին:
«Մեր երկրում գոյություն ունի Մրցակցության պաշտպանության մասին օրենք, բայց չկա հակամենաշնորհային օրենք, եթե խնդիրը դիտարկում ենք մրցակցության պաշպանության տեսանկյունից` սա ենթադրում է, որ կարող է լինել մենաշնորհային տնտեսություն, բայց չլինի գին թելադրող»,- նշեց Վիլեն Խաչատրյանը:
Նրա կարծիքով` մեզ մոտ ներմուծման մոնոպոլիաներ են: Եթե Հայաստանում ներմուծելու մոնոպոլիայից անցնեն արտահանելու մոնոպոլիա` տնտեսությունը կզարգանա: Պետք է գաղափարական կողմը փոխել այնպես, որ ներքին մոնոպոլիաները, ընդհակառակը` արտաքին դաշտ տեղափոխվեն: «Մեր մոնոպոլիաները հակազդող ուժ կարող են լինել դրսի հզոր ֆիրմաների դեմ: Խնդրին պետք է նայել ոչ միայն ներմուծման, այլ նաև արտադրական ոլորտի մոնոպոլիաների տեսանկյունից»:
«Այն փողերը, որ կուտակվում են մի խումբ մոնոպոլիստների մոտ` անմաքուր փողեր են, որովհետև դրանք մյուս քաղաքացիների հաշվին են կուտակվել: Այդ գումարների մի մասը տալիս են իրենց բարձր հովանավորյալներին` միշտ կապ պահելու համար, մի մասը ծախսում են թիկնապահներ վարձելու համար, մի մասն էլ իրենց հաճույքների համար: Այսպիսի գումարները երբ շատանում են, դրանք պահելու համար վախ, դեպրեսիա է առաջանում: Քրտինքով վաստակած գումարների դեպքում` նման բան չկա»,- նշեց Իրավաբանների և հոգեբանների միջազգային ասոցիացիայի նախագահ Խաչատուր Մարոզյանը:
Նրա կարծիքով` վերջին քսան տարիներին հայ ժողովուրդն ականատես է լինում դեպրեսիայի, վախի ու անօրինականության:
«Ժամանակն է, որ ակտիվ հասարակական օղակները սկսեն պայքարել, որ մոնոպոլիաներ չլինեն Հայաստանում»,- ասաց Խաչատուր Մարոզյանը:
Բանախոսների կարծիքով` անձերը մեղավոր չեն, համակարգն է այդպիսին: «Նախագահներին մինչև նախագահ դառնալը ճանաչել եմ, արժանի, լավ մարդիկ են եղել, հենց իշխանության են եկել` կործանվել, փչացել են: Համակարգն է այդպիսին»,- ասաց Խաչատուր Մարոզյանը:
Լուսանկարը՝ PanARMENIAN Photo-ի