Մի քանի տասնյակ կիլոմետրի հասնող խցանումներ են առաջացել Ճապոնիայի ավտոմայրուղիներին՝ կապված «օ-բոն» ավանդական տոնի՝ հանգուցյալների հիշատակի օրվա հետ: Այս մասին հայտնում է ITAR-TASS-ը:
Կանագավա պրեֆեկտուրայում՝ առանցքային ավտոմայրուղիներից մեկի՝ Տոմեյի վրա, որը կապում է Տոկիոն Նագոյա քաղաքի հետ, 43 կմ երկարությամբ խցանում է առաջացել: Ավելի քան 30 կմ երկարությամբ մեկ այլ խցանում էլ առաջացել է Յամանասի պրեֆեկտուրայում՝ Տյուո ավտոմայրուղու վրա:
Երկաթուղային կայանները նույնպես գերբեռնված են: Երկրի առաջատար ավիափոխադրողները հայտնում են, որ առաջիկա օրերի գրեթե բոլոր տոմսերն արդեն վաճառված են:
Տոնը հստակ ամսաթիվ չունի, սովորաբար նշվում է օգոստոսի կեսերին: Շատ ճապոնացիներ այս օրերին լքում են մեգապոլիսներն ու այցելում հարազատների գերեզմաններ:
