ՀՀ ոստիկանությունում հաշվառված են մուրացկանությամբ զբաղվող 5 անչափահասներ: Այսօր լրագրողների հետ հանդիպման ժամանակ այս մասին ասաց ՀՀ ոստիկանության ՔՀԳՎ 3-րդ վարչության պետ, ոստիկանության գնդապետ Նելլի Դուրյանը:
Վերջինիս խոսքերով՝ նման անչափահասների հայտնաբերելուն պես սկսում են աշխատանքներ իրականացնել նրանց համայնքային վերականգնողական կենտրոններում։ Ըստ բանախոսի՝ դա ամենօրյա աշխատանք է, որն, ի դեպ, իրականացվում է ոչ միայն նրանց հետ, այլև՝ նրանց ծնողների, որովհետև սովորաբար անչափահասներին մուրացկանության են դրդում հարազատները կամ ծնողները:
«Շուրջ 1000 անչափահաս ներկայացվել է վերականգնողական կենտրոն, և նրանցից չորսի դեպքում քրեական գործ է հարուցվել ազգականի և ծնողի դրդմամբ մուրացկանությամբ զբաղվելու համար»,- տեղեկացրեց ոստիկանության գնդապետը:
Նա անդրադարձավ Հյուսիսային պողոտայում մուրացկանություն անող հայտնի ընտանիքին՝ ասելով, որ երեխաների տատիկն ու մայրը գերադասում են երեխաների միջոցով մուրացկանությամբ զբաղվել, քան աշխատել, որի ուղղությամբ ոստիկանությունը բազմիցս է առաջարկներ արել: «Ի վերջո հասկանալով, որ այլ պատժամիջոցներ չկան, քրեական գործ է հարուցվել տվյալ ընտանիքի դեմ»,- ասաց Նելլի Դուրյանը:
Նրա խոսքերով՝ ՀՀ ոստիկանությունը բավականին երկար աշխատել է նաև «Մոսկվա» կինոթատրոնի մոտ մուրացկանությամբ զբաղվող տիկին Հեղինեի հետ, սակայն՝ ապարդյուն. կնոջը փողոցից կտրելը գրեթե անհնար է դարձել:
