Անդրադառնալով Վրաստանում տեղի ունեցող զարգացումներին՝ այսօր ԱԺ դաշնակցական պատգամավոր Լիլիթ Գալստյանը մեզ հետ զրույցում ասաց, թե լրահոսից ընդգծել է, որ Վրաստանի հանրային հեռուստաընկերությունը ուղիղ եթեր էր տրամադրել ընդդիմությանը:
«Տպավորությունս այնպիսին է, որ մի բան բեկվում է։ Ինչպես Բուրջանաձեն նկատեց՝ դա իրենց փոքրիկ հաղթանակն է։ Լրահոսից նաև ֆիքսեցի, որ մինչ օրս տարբեր բևեռներում գտնվող քաղաքական գործիչները կարծես թե միավորվելու ազդակ ունեն»,- նկատեց Լիլիթ Գալստյանը։
Նրան դուր չէր եկել այն հանգամանքը, որ Վրաստանում պոռթկումի ալիքը բարձրացել էր այն ժամանակ, երբ Սահակաշվիլին գտնվել է Հունգարիայում: «Ես մարդկայնորեն չէի ցանկանա, որ, երբ իմ երկրի նախագահը բացակայի, ընտանիքում մեջքից հարված հասցնեն։ Ես սիրում եմ իմ ընդդիմախոսների և հակառակորդների հետ ճակատ ճակատի և բաց տեքստով խոսել։ Մյուս կողմից էլ, երբ առիթ է լինում համեմատվել Վրաստանի ժողովրդավարության, կոռուպցիայի և տնտեսության ձեռքբերումների հետ՝ տեսնում ենք, որ Վրաստանը շահեկանորեն առաջ է:
Եվ առաջընթացի ֆոնին ընդվզման այս ալիքը ստիպում է ինձ մտածել՝ սա բարեփոխմա՞նն է միտված, թե՞ պարզ իշխանական և աթոռի կռիվ է։ Չգիտեմ, ես ինքս նման հարց ունեմ»,- ավելացրեց ԱԺ պատգամավորը:
Վրաստանում տեղի ունեցող իրադարձությունները նրան ակամայից հիշեցրել են նաև Մարտի 1-ը: «Երբ տեսա իշխանության և ընդդիմության ընդհարումը, փայտե ձողեր և այլն, այդ ամենին կողքից նայելը սարսափելի էր, մանավանդ երբ Մարտի 1-ը ենթագիտակցորեն նստած է մեր մեջ: Չէի ցանկանա, որ մեր երկրում այդ ամենը կատարվի` հայը հայի դեմ զենք բարձրացնի, ուժ կիրառի, ինչպես նաև չէի ցանկանա, որ այդ ալիքը մեր երկրում լինի։ Ուզում եմ հավատալ, որ քաղաքական երկխոսությունը խորքային կլինի, բովանդակություն կունենա և իշխանության պարզ բաժանման շուրջ չի լինի, այլ՝ պետության և ազգային օրենքի»,- հույս հայտնեց Լիլիթ Գալստյանը։
