Android օպերացիոն համակարգը կրկին ավելացրել է մրցակիցներից իրեն բաժանող տարածությունը: Ինչպես նշվում է IDC գործակալության զեկույցում՝ 2013թ. II եռամսյակում համաշխարհային շուկա է մատակարարվել 187,4 միլիոն Android-սմարթֆոն՝ ավելի շատ, քան 2012 թ. նույն ժամանակահատվածում բոլոր պլատֆորմները միասին վերցրած:
Google-ի օպերացիոն համակարգի բաժինը տարեցտարի ավելացել է՝ 69,1 %-ից հասնելով մինչև 79,3 %-ի, իսկ դրանցով աշխատող գաջեթների մատակարարման ցուցանիշն ավելացել է 73,5 %-ով՝ անցած տարվա 108 միլիոնի դիմաց 187,4 միլիոն կազմելով:
Android-ի հետ համեմատած՝ Windows Phone-ի չափաաժինը կարող է շատ համեստ թվալ՝ 3,7 %: Չնայած որ WP-ով աշխատող սարքավորումների թիվը մեկ տարում ավելացել է 77,6 %-ով, իսկ ամբողջ շուկան 51,3 %-ով, Microsoft պլատֆորմի բաժինն այս ժամանակահատվածում աճել է միայն 0,6 %-ով:
Ինչևէ, Windows Phone-ն աշխարհում տարածված երրորդ օպերացիոն համակարգն է, որը զիջում է միայն այնպիսի հսկաների, ինչպիսիք են Android-ն ու iOS-ը: Այս պահին ամենից շատ WP-սմարթֆոններ թողարկում է Nokia-ն (81,6 %), դրան հաջորդում են Samsung-ը (11,5 %) ու HTC-ն (4,6 %):
Վերլուծաբանները նշում են, որ Android-ի աճին ամենից շատ նպաստեց ապրիլին թողարկված Galaxy S4-ը, ինչպես նաև՝ այլ ասիական արտադրողներ՝ LG-ն, Huawei-ն և Lenovo-ն:
