«Բյուջեի ծավալներն իսկապես համեստ են, բայց շատն էլ կարելի է փոշիացնել ապաշնորհ վարչարարության ու մսխումների դեմը չառնելու պարագայում, իսկ որակյալ ու հմուտ կառավարման դեպքում քիչ ռեսուրսներով էլ կարելի է լավ արդյունքների հասնել և զարգացամն համար նոր հնարավորություններ առաջացնել:
Վստահ ենք, որ ներկայացված բյուջեն լիովին բավարար է` հասնելու այնպիսի խնդիրների լուծման, որոնք ոչ այնքան ծախս են պահանջում, որքան կամք և կառավարման արդյունավետություն: Կարևորում ենք կառավարության կողմից չափելի միջոցառումների, ծրագրերի իրականացումը` բյուջետային ծրագրավորման ներդրումը, կառավարման համակարգի օպտիմալացումը, ծախսերի սահմանափակումը, ավելորդ հիմնարկների կրճատումը, քաղաքացիներին ու տնտեսվարող սուբյեկտներին հասանելի վարկավորում ապահովելը, կեղեքիչ վարչարարության վերացումը»,- այսօր ԱԺ-ում 2017թ. բյուջեի նախագծի քննարկման ժամանակ ասաց ՀՅԴ խմբակցության ղեկավար Արմեն Ռուստամյանը:
Տնտեսական աճի այն ցուցանիշը, որն ամրագրել է կառավարությունը, ըստ ՀՅԴ խմբակցության ղեկավարի բավական պահպանողական է. «Բայց համոզված ենք, որ, այս գործընթացներն իրականացնելով, տարածաշրջանային և ներքին կայունության պամաններում տնտեսական աճն ավելի բարձր կարող է լինել: Պարզապես կառավարությանը կոչ ենք անում առաջին իսկ հնարավորության դեպքում անդրադառնալ քաղաքացիների եկամուտների բարձրացման քաղաքականությանը»:
Արմեն Ռուստամյանը հավելեց, որ ՀՅԴ-ն կողմ է քվեարկելու 2017-ի բյուջեի նախագծին:
