«Չորս տարի առաջ ես կանխատեսեցի, որ Ռուսաստանը կներխուժի Ուկրաինա։ Ահա իմ հերթական կանխատեսումը, որը զարմանալիորեն ակնհայտ է. հաջորդը կլինի Մերձբալթիկան»,- գրում է Ջորջ Բուշ-կրտսերի և Բարաք Օբամայի օրոք ԱՄՆ Ազգային անվտանգության խորհրդի նախկին աշխատակից Փոլ Դ. Միլլերը Foreign Policy-ի համար հոդվածում։
Պուտինի և ռուսների համար, որոնք աշխարհին նայում են կրոնական ռուսական ազգայնականության պրիզմայով, Արևմուտքը սպառնալիք է գլոբալիզմի պատճառով՝ կարծում է հեղինակը։ Այժմ Պուտինը հայտնվել է ամենաշահավետ միջազգային պայմաններում ռուսական էքսպանսիան շարունակելու համար։ Եվրոպայի միասնականությունը խարխլվում է, իսկ ԱՄՆ հաջորդ նախագահը կարծես թե բացահայտորեն բարեհաճ է Ռուսաստանի նկատմամբ։
Պուտինի հաջորդ քայլն ավելի վտանգավոր է, քան նախորդը, քանի որ նա, ամենայն հավանականությամբ, կներխուժի Մերձբալթյան երկրներ, որոնք ՆԱՏՕ-ի անդամներ են։ Պուտինը ռուս զինվորականներ չի ուղարկի այդ երկրների սահմաններ, փոխարենը կհրահրի ոչ միանշանակ ռազմական ճգնաժամ։ Հավանաբար ռուսախոս էստոնացիները և լատվիացիները կսկսեն բողոքել, իրավունքների պաշտպանություն պահանջել, հայտարարել հետապնդումների մասին և «միջազգային պաշտպանություն» խնդրել։ Կհայտնվի կասկածելիորեն լավ զինված և նախապատրաստված «ռուսական Բալթիկայի ազատագրման ազգային ճակատ»՝ ասվում է հոդվածում։
Տեղի կունենա ՆԱՏՕ-ի գագաթնաժողով, Լեհաստանը կպահանջի գործի դնել ՆԱՏՕ-ի կանոնադրության 5-րդ հոդվածը։ Գերմանացիները և ֆրանսիացիները դեմ կլինեն, բոլորը կնայեն ԱՄՆ-ի կողմը, որպեսզի հասկանան՝ ո՞ւմ կողմից է դաշինքի առաջնորդը՝ ենթադրում է Միլլերը։ Եթե դաշինքը գործի չդնի 5-րդ հոդվածը, ապա ՆԱՏՕ-ի պարտավորվածությունների փոխադարձ երաշխիքը գործնականում անիմաստ կդառնա։ Արևելաեվրոպական որոշ պետություններ կարող են անցնել ավելի ուժեղի՝ Ռուսաստանի կողմը։ Մյուսները, սկսած Լեհաստանից, կսկսեն զինվել մինչև ատամները։
Բայց եթե դաշինքը կիրառի 5–րդ հոդվածը, դա կնշանակի, որ Արևմուտքը պատերազմ է հայտարարում Ռուսաստանին։ Եվ հենց այդ ժամանակ Թրամփը պետք է որոշի՝ արդյոք Լատվիայի պաշտպանությունն արժե՞ երրորդ համաշխարհային պատերազմ սկսելու համար՝ եզրափակում է Միլլերը։
