«Ասավալ-Դասավալի» թերթին տված հարցազրույցում Վրաստանի նախկին նախագահ էդուարդ Շևարդնաձեն անդրադարձել է վրացական ընդդիմության ցույցերին.
«Թբիլիսիում խաղաղ ցուցարարների նկատմամբ իշխանությունների կողմից ուժի գործադրումը վանդալիզմ ու հանցագործություն է: Ցուցարարների նկատմամբ ռետինե փամփուշտների ու արցունքաբեր գազի կիրառումը վնասում է միջազգային ատյաններում Վրաստանի վարկին:
2003 թվականին ես ընդդիմության ճնշման տակ հրաժարական տվեցի, որպեսզի կանխեմ արյունահեղությունը: Արդյո՞ք Սաակաշվիլին այդքան խիղճ կունենա և կվարվի ինձ նման: Ո՛չ, Սաակաշվիլին չի հեռանա, նա կփորձի երկարացնել իր իշխանության ժամկետը: Նա շատ չարիքներ է գործել և չի կարող նահանջել: Սաակաշվիլին վախենում է ժողովրդից»:
Հիշեցնենք, որ դեռևս մայիսի 9-ին Շևարդնաձեն հայտարարել էր, թե հեղափոխությունն իրականացնում է ոչ թե ընդդիմությունը, այլ ժողովուրդը.
«Այսօր վրացական ընդդիմությունն ի վիճակի չէ փողոց դուրս բերել 10,000 հոգու: Հեղափոխությունն իրականացնում է ոչ թե ընդդիմությունը, այլ` ժողովուրդը: Երկու տարի առաջ փողոց դուրս եկավ 60,000 մարդ, սակայն ընդդիմությունն ի վիճակի չեղավ անհրաժեշտ քայլեր անելու:
Այժմ ժողովուրդը հիասթափվել է ընդդիմությունից, և որպեսզի մենք նորից տեսնենք երկու տարի առաջ փողոց դուրս եկած մարդկանց թիվը, ժամանակ է պետք»: