ՀՀ ԶՈՒ գլխավոր շտաբի պետի նախկին տեղակալ, գեներալ-լեյտենանտ Արշալույս Փայտյանը նախօրեին հայտարարել էր, որ Արթուր Ալեքսանյանի (Ամարասի Արթուր) հիմնած «Միասնական Արմենիա» նախաձեռնության գաղափարական ուղենիշ-ծրագիրը ոչ միայն ազգային է, այլև համամարդկային: Փայտյանը, սակայն, չէր հստակեցրել՝ առաջիկայում հնարավո՞ր է, որ միանա Ալեքսանյանի հիմնած նախաձեռնությանը։
«Առաջին լրատվական»-ի հետ զրույցում նախաձեռնությանը միացած Ազատ Արշակյանը նշեց, որ Արշալույս Փայտյանն իրենց մարտական ընկերն է, բայց «Միասնական Արմենիա» նախաձեռնության հետ առնչություն չունի. «Նա ոչ դիմել է, ոչ էլ մենք այդ հարցը քննարկել ենք։ Ես հենց հիմա Արթուր Ալեքսանյանի աշխատասենյակում եմ և վստահեցնում եմ՝ նման հարց չենք քննարկել։ Մենք Փայտյանի հետ հին բարեկամներ ենք»։
Հարցին՝ եթե ամեն դեպքում Արշալույս Փայտյանը ցանկություն հայտնի միանալու իրենց նախաձեռնությանը, իրենք ի՞նչ դիրքորոշում կունենան, Ազատ Արշակյանն արձագանքեց. «Մեր դռները բաց են, կարծում ենք՝ մեր ծրագիրը օգտակար է։ Ովքեր ուզում են, որ Սփյուռք-Արցախ-Հայաստան համերաշխությունը կայանա, մենք չենք կարող որևէ մեկին ասել՝ ոչ։ Բայց դիմում ու քննարկում չի եղել»,- եզրափակեց Ազատ Արշակյանը։
