Շիրակի մարզի ընդհանուր իրավասության դատարանում Հարություն Մովսիսյանի նախագահությամբ ընթանում է Գյումրիի բնակչուհի, 25-ամյա Արեգնազան Բաղդասարյանի գործի դատավարությունը:
Ըստ մեղադրանքի՝ 2013 թվականի հունվարի 1-ին Արեգնազանն իր մանկահասակ որդու հետ գնացել է Ֆ. Սարգսյանի տնակ: Ամանորյա ուրախ տրամադրության փոխարեն Բաղդասարյանի ու Սարգսյանի միջև վիճաբանություն է սկսվել: Քաշքշուկի ընթացքում Արեգնազանը ձեռքերով հրել է Սարգսյանին, վերջինս ընկել է, գլուխը խփել մետաղե վառարանին ու կորցրել գիտակցությունը:
Արեգնազանը, առաջադրված մեղադրանքի համաձայն, ալեհավաքի լարով սպանելու դիտավորությամբ փորձել է խեղդամահ անել անգիտակից Սարգսյանին: Այնուհետև երեխայի հետ հեռացել է:
Սարգսյանը տևական ժամանակ իր տնակում անգիտակից ընկած է մնացել վառարանի մոտ, որի ծխատար խողովակից դուրս եկած արգասիքներից առաջացել է բաց կրակ ու հրդեհ է բռնկվել:
Վառարանի մոտ ընկած, դեռևս ողջ Սարգսյանը մեծ քանակությամբ ածխածնի մոնօքսիդ շնչելու հետևանքով թունավորվել է, բարձր ջերմաստիճանի բոցի ներգործության արդյունքում մարմնի տարբեր հատվածներում այրվածքներ է ստացել: Այրվածքային շոկից և գանգուղեղային փակ վնասվածքից, համաձայն դատաբժշկական փորձաքննության եզրակացության, Ֆ. Սարգսյանը մահացել է:
Արեգնազան Բաղդասարյանին մեղադրանք է առաջադրվել դիտավորյալ սպանության փորձի համար՝ ՀՀ քրեական օրենսգրքի 34-104 հոդվածի 1-ին մասով, ինչպես նաև՝ 109 հոդվածի 1-ին մասով: Բաղդասարյանի խափանման միջոցը կալանավորումն է:
