News Georgia լրատվական գործակալության փոխանցմամբ՝ Վրաստանի նախկին նախագահ Միխեիլ Սաակաշվիլին հայտնել է իր ստեղծած «Միացյալ ազգային շարժում» (ՄԱՇ) կուսակցության մի շարք առաջնորդների հետ լուրջ տարաձայնություններ ունենալու մասին։
Վրաստանի երրորդ նախագահը, ով նախորդ տարվանից Ուկրաինայի քաղաքացի է և մինչև վերջերս զբաղեցնում էր Օդեսայի նահանգապետի պաշտոնը, Facebook-ի իր էջում տեսանյութ հրապարակել, որում պատմել է ՄԱՇ-ի հետ կապված խնդիրների մասին։
Թեև Սաակաշվիլին չի տվել կոնկրետ անուններ, թե ում հետ ունի տարաձայնություններ, սակայն անկասկած է համարվում, որ նա նկատի է ունեցել կուսակցության միջազգային հարցերով քարտուղար Գիգա Բոկերիային և կուսակցության այն անդամներին, ովքեր կողմ են արտահայտվում, որ Սաակաշվիլին հեռու մնա ՄԱՇ-ից, որ նվազեցվի նրա դերը կուսակցությունում և ընտրվի կուսակցության նոր նախագահ։
Սաակաշվիլին հայտարարել է. «Նրանք փոխանակ հավաքեն մարդկանց ու պայքարի կոչ անեն, զբաղված են ինչ-որ մեկի մատնացույց անելով և ասելով, թե խնդիրը Սաակաշվիլին է։
Ես չեմ ցանկանում որևէ գործ ունենալ 2-3 այդ խելացնոր մարդկանց հետ, այդ թվում նաև կուսակցության ղեկավարությունում»։
Սաակաշվիլին դրա հետ մեկտեղ այս շաբաթվա ընթացքում արդեն երկրորդ անգամ հայտարարում է, որ իր ապագան այժմ կապված է Ուկրաինայի հետ և որ նա ծրագրում է քաղաքական գործունեություն ծավալել հենց այդ երկրում։
