Արաբկիր Քանաքեռ-Զեյթուն վարչական շրջանների ընդհանուր իրավասության դատարանն այսօր քննեց «Հիմնադիր խորհրդարանի» անդամ Կարո Եղնուկյանի տեսակցությունների սահմանափակման վերաբերյալ բողոքը:
Դատական նիստը այսօր հետաձգվեց հաջորդ նիստը նշանակվեց նոյեմբերի երեսունին:
Դատական նիստից հետո լրագրողների հետ զրույցում Տիգրան Հայրապետյանն ասաց, որ կրկին հետաձգվեց Կարո Եղնուկյանի նկատմամբ սահմանված սահմանափակումների ժամկետը, այս անգամ՝ դատարանի ծանրաբեռնվածության պատճառով. «Արդեն երկրորդ դատական նիստն է դատարանի ծանրաբեռնվածության պատճառով հետաձգվում, և Եղնուկյանի նկատմամբ սահմանված արգելքը շարունակվում է արդեն դատարանի կողմից օրինական ձևով»:
Տիգրան Հայրապետյանը նշեց, որ աննախադեպ մեղադրանք է ներկայացվում, անձին մեղադրում են ազատություններ և իրավունքներ իրականացնելու համար: Բացի մեղադրելուց՝ նաև սահմանափակում են նրա իրավունքները: Փաստաբանի խոսքով՝ իր պաշտպանյալի նկատմամբ անհեթեթ մեղադրանքներ են առաջադրվել. «Այդ թվում նաև այն բանի համար, որ իբրև թե ԱԱԾ-ն կամ այլ ծառայություն ցանկացել է գրոհել ՊՊԾ գնդի վրա, Եղնուկյանն իրենց խանգարել է, և գրոհը տապալվել է: Անգամ եթե դա խանգարել է իրականում, թեպետ Եղնուկյանն ասում է, որի չի արել, ապա դրանով նա արյունահեղություն է դադարեցրել, բայց նրան չեն ներում դրա համար»:
Փաստաբանի կարծիքով՝ Կարո Եղնուկյանը քաղբանտարկյալ է:
Հիշեցնենք, որ Կարո Եղնուկյանին մեղադրանք էր առաջադրվել Քրեական օրենսգրքի 218-րդ և 219-րդ հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար:
Մանրամասները՝ տեսանյութում:
