ՄԱԿ-ի գլխավոր քարտուղար Պան Գի Մունը խնդրում է մեկ տարով երկարեցնել Լիբանանում խաղաղապահների մանդատը՝ Իսրայելի հետ «կապույտ գծի» ռեժիմը վերահսկողության տակ պահելու համար: Այս մասին հաղորդում է Ria Novosti-ն՝ վկայակոչելով ՄԱԿ-ի գլխավոր քարտուղարի՝ սույն կազմակերպության Անվտանգության խորհրդին ուղղված նամակը:
Լիբանանում ՄԱԿ-ի ուժերի (UNIFIL) ներկայիս մանդատի ժամկետը լրանում է օգոստոսի 31-ին:
Հուլիսի 15-ին այդ զորախմբի ընդհանուր թիվը կազմում էր 10 հազար 640 մարդ՝ 37 երկրներից:
Պան Գի Մունն, ընդհանուր առմամբ, առաջընթաց է արձանագրել Լիբանանի և Իսրայելի միջև «կապույտ գծի» սահմանազատման հարցում խաղաղություն պահպանելու միջոցառումների շրջանակներում: «Սակայն, միևնույն է, այժմ, երբ UNIFIL-ի մանդատի գործողությունների ժամկետը սպառվում է, ակնհայտ է, որ դեռևս ամեն ինչ արված չէ»,- նշվում է Պան Գի Մունի նամակում:
