ԵՄ արտաքին քաղաքականության և անվտանգության հարցերով գերագույն հանձնակատար Քեթրին Էշթոնը պատրաստում է երրորդ այցը Եգիպտոս՝ իշխանությունից Մուհամմադ Մուրսիի հեռացումից հետո: Այս մասին ITAR-TASS-ին հայտնել է անանուն եվրոպացի դիվանագետը: Էշթոնի առաջին երկու այցերը Եգիպտոս գործնական արդյունքներ չեն տվել:
Դիվանագետը նշել է, որ Եգիպտոսում ԵՄ ջանքերի գլխավոր նպատակն է իրադրությունը լիցքաթափել ու նպաստել քաղաքական գործընթացին՝ լարվածության սրում թույլ չտալու համար:
Նա «օգտակար» է համարել անցած գիշեր կայացած հանդիպումը ԱՄՆ-ի, ԵՄ-ի, Կատարի և ԱՄԷ-ի ներկայացուցիչների ու «Մուսուլման եղբայրներ» կազմակերպությունում «երկրորդ մարդ» հանդիսացող Հեյրաթ Ալ-Շատերի հետ, ով գտնվում է ճաղերի հետևում՝ բռնության հրահրման մեղադրանքով: Աղբյուրը չի հաստատել, որ ԵՄ-ն ձգտում է հասնել Ալ-Շատերի շուտափույթ ազատ արձակմանը՝ ժամանակավոր կառավարության հետ «Մուսուլման եղբայրների» բանակցությունների մեկնարկի համար ջանքերի գործադրման նրա խոստման դիմաց:
«Դեռևս վաղ է կոնկրետ անձանց ճակատագրի մասին խոսելը: ԵՄ-ն միշտ դեմ է եղել քաղաքական սկզբունքով մարդկանց բանտարկությանը, սակայն յուրաքանչյուր կոնկրետ դեպքում պետք է պարզաբանում կատարի դատարանը: Ինչ վերաբերում է Եգիպտոսում ընդհանուր վիճակին, ներկայում ամենագլխավորը բռնությունից խուսափելն է»,- ընդգծել է նա:
