Ուրանի հանքի շահագործման հնարավոր հետևանքների մասին ահազանգեցին բնապահպան Կարինե Դանիելյանը և «Էկոլուր» հասարակական կազմակերպության նախագահ Ինգա Զարաֆյանը: Որքան էլ էներգետիկայի և բնական պաշարների նախարարությունը հանգստացնում է Սյունիքի մարզի բնակչությանը` հայտարարելով, թե որևէ ռիսկ չկա, պարզվում է, որ վախը բնակիչներին չի լքում: Ինգա Զարաֆյանը նշեց, որ Ռուսաստանում ուսումնասիրություններ են կատարվել, որոնցից պարզվել է, թե ինչ ծանր հետևանքներ է ունենում ուրանը հատկապես մինչև 14 տարեկան երեխաների վրա: Որոշ տվյալներով, ԽՍՀՄ-ը հանքեր է ունեցել Հունգարիայում և Չեխիայում, որոնք փակվել են: Ինգա Զարաֆյանը հիշեցրեց, որ Սյունիքի մարզն ունի գրունտային բարդ ռելիեֆ, և գրունտային ջրերը կվարակվեն ռադիոակտիվ նյութերով: «Էկոլուր» ՀԿ ղեկավարն ուշադրություն հրավիրեց այն փաստի վրա, որ հասարակության կարծիքն անտեսվում է:
