Վանաձորի համայնքապետարանի պաշտոնական կայքէջից տեղեկանում ենք, որ նոյեմբերի 5-ին՝ առաջիկա շաբաթ օրը տեղի կունենա Վանաձրի ավագանու արտահերթ նիստ։ Օրակարգում ընդգրկված է 6 հարց՝ այդ թվում Վանաձորի համայանքապետարանի աշխատակազմի կանոնադրությունը ընդունելու հարցը։
Նիստը տեղի կունենա, թե ոչ, առայժմ անհայտ է, քանի որ Հանրապետական կուսակցությունն ու կոալիցիոն գործընկեր Դաշնակցությունը միասին ունեն 15 մանդատ, «Լուսավոր Հայաստան»-ը, «Բարգավաճ Հայաստան»-ը և «Հայկական Վերածնունդ»-ը՝ միասին 18 մանդատ։ Այս երեք կուսակցությունները որոշում էին կայացրել բոյկոտել ավագանու նիստն այնքան ժամանակ, մինչև կբացահայտվեն պայմանավորվածությունը դրժած անձինք։
«Լուսավոր Հայաստան» խմբակցության ղեկավար Քրիստ Մարուքյանը «Առաջին լրատվական»-ի հետ զրույցում ասաց, որ նախապես որոշվածի համաձայն՝ իրենք բոյկոտելու են նիստը։ Հետաքրքրվեցինք, թե բոյկոտի միասնական պայմանավորվածությունը ընդդիմադիր խմբակցությունների մեջ պահպանվել է , թե ոչ, Մարուքյանն արձագանքեց. «Որևէ բան չի փոխվել, առանձին որևէ մեկը հայտարարությամբ հանդես չի եկել։ Սրանից կարելի է ենթադրել, որ պայմանավորվածությունն ուժի մեջ է»։
Կարո՞ղ է նախորդի փորձով, որևէ բան փոխվի վերջին պահին հարցին ի պատասխան էլ մեր զրուցակիցը նշեց. «Ամեն ինչ էլ հնարավոր է, վերջին պահին միշտ հետաքրքիր փոփոխություններ են լինում։ Երկու ավագանին արդեն բավարար կլինի, որ նիստը իրավազոր լինի»,- եզրափակեց Քրիստ Մարուքյանը։
«Բարգավաճ Հայաստան» կուսակցության նախագահ Նաիրա Զոհրաբյանը «Առաջին լրատվական»-ի հետ զրույցում վստահեցրեց, որ իրենց կուսակցության ավագանու երեք անդամները՝ նախապես ձեռք բերված պայմանավորվածության համաձայն շարունակելու են բոյկոտը։
«Հայկական Վերածնունդ» կուսակցության լրատվության և հասարակայնության հետ կապերի պատասխանատու Էդգար Առաքելյանը մեզ հետ զրույցում նշեց, որ իրենց ավագանիների մասով՝ բոյկոտի որոշումը ևս ուժի մեջ է։
Լուսանկարը՝ Photolure-ի
