Փոքրիկ ամերիկյան քաղաքը երկրորդ անգամ քաղաքապետ է ընտրել նախադպրոցականի: Ինչպես հայտնում է Associated Press-ը, չորս տարեկան Բոբի Թաֆթսն ընտրվել է Դորսեթի ղեկավար օգոստոսի 4-ին կայացած քաղաքային փառատոնի ժամանակ:
Դորսեթում քվեարկությունն ընթացել է քաղաքի խանութներում: Վաճառակետերում անոթներ են դրված եղել, և բոլոր ցանկացողները կարող էին թերթիկներ գցել իրենց սիրելի թեկնածուների անուններով: Կարելի էր քվեարկել անսահմանափակ քանակությամբ: Դրա հետ մեկտեղ քվեարկողները պետք է մեկ դոլար նվիրաբերեին փառատոնի կազմակերպման համար:
Երբ արդյունքներն ամփոփելու ժամանակը եկել է, Բոբին խնդրել է ամբոխից մի տղամարդու օգնել իրեն: Կապված աչքերով տղամարդը գլխարկի միջից պետք է հաներ «քվեաթերթիկներից» մեկը: Ընտրողը հանել է հենց Բոբիի անունը: Նրան խնդրել են հանել ևս մեկ թերթիկ, որտեղ նորից Բոբիի անունն է եղել:
Բոբիի մայրը հաղորդել է, որ ինքն ու որդին ուղղակի զարմացած են կատարվածից, քանի որ անցյալ տարի ևս ընտրությունները այդպիսի արդյունք են ունեցել:
