Georgia Online-ի փոխանցմամբ՝ Վրաստանի Ազգային բանկի նախկին նախագահ, 36-ամյա տնտեսագետ Գեորգի Կադագիձեն հայտարարել է, որ իր կարծիքով՝ խորհրդային էլիտա, որը 1990-ական թվականներին Վրաստանում թույլ է տվել քաղաքական ու տնտեսական ճգնաժամի առաջացում, չի կարող բարոյական հեղինակություն լինել նոր սերնդի համար։
Կադագիձեն առաջարկել է հետաձգել Վրաստանում վերջին 10 տարվա վերաբերյալ վեճերը և իշխող կուսակցության ու ընդդիմության միջև հաշիվներ մաքրելը, և դրա փոխարեն ուշադրություն հատկացնել 1990-ական թվականների սկզբի ճգնաժամին.
«Եթե չլիներ 1990-ական թվականների սկզբի ճգնաժամը, ապա տնտեսության այսօրվա ծավալին մենք կհասնեինք արդեն 1996 թվականին։ Իսկ ներկայումս՝ 2016 թվականին, Վրաստանն արդեն իսկ կլիներ այնտեղ, ուր կլինի միայն 20 տարի անց (դա ներկայիս Լեհաստանի մակարդակն է)։
1991-1994 թվականներին Վրաստանը կորցրեց իր տնտեսության 70 տոկոսը։ Նման անկում չի ունեցել որևէ հետխորհրդային երկիր։ Դրա հետևանքով իրենց ընտանիքներին կերակրելու համար արտագաղթեց 1 միլիոն մարդ՝ տնտեսական ու սոցիալական պլանում բնակչության ամենաակտիվ մասը։
Ամբողջովին ավերվեցին կրթական, առողջապահական, ֆինանսների համակարգերն ու մյուս ենթակառուցվածքները։ Երկիրը խրվեց էներգոդեֆիցիտի, կրիմինալի, կոռուպցիայի ու անպատասխանատվության ճահիճը։
Հետագա 10 տարում արտերկրից արվող դրամական փոխանցումներն ու մետաղաջարդոնի արտահանումը դարձան երկրի եկամտի գլխավոր աղբյուրը։ Ես չեմ հարգում խորհրդային էլիտայի արժեքները, որը կարող էր ծափահարել ամեն բանի՝ իրեն բնակարան տալու, իր երեխաներին բուհ ընդունելու, օպերա ու թատրոն հաճախելու կամ որևէ առողջարանում հանգստանալու հրավեր ստանալու դիմաց»։
