Բրիտանական The Independent թերթի փոխանցմամբ՝ ՄԱԿ-ի Բնակչության հիմնադրամը (UNFPA) զգուշացրել է «Մեթյու» փոթորկից հետո Հայիթիում ակնկալվող զանգվածային բռնաբարությունների մասին։
Կազմակերպության տվյալներով՝ ընդհանուր առմամբ ավելի քան 10.000 կին է գտնվում նման ռիսկի տակ, որոնք գտնվում են փոթորկից տուժած շրջաններում։ ՄԱԿ-ի պաշտոնական ներկայացուցիչ Մարիել Սանդերը հիշեցրել է, որ 2010 թվականին Հայիթիում գրանցված ավերիչ երկրաշարժից հետո հղիների թիվն աճել էր եռակի, ինչը կապված էր բռնաբարությունների թվի 20 տոկոսանոց աճի հետ։
Սանդերը պարզաբանել է, որ բռնաբարությունների մակարդակն աճում է, երբ մարդիկ հարկադրված են լքել իրենց տներն ու զրկվում են իրենց հարազատների ու ընկերների պաշտպանությունից.
«Նրանք դառնում են ավելի խոցելի։ Անգամ արտաքնոց սովորական գնալը կարող է վտանգ պարունակել։ Բացի այդ, հայտնի է, որ պատերազմներից ու աղետներից հետո մարդիկ միմյանց հետ շփումներ են փնտրում, և եթե երկրորդ կողմը չի ցանկանում շփում, ապա դա կարվի բռնի ձևով»։
Սանդերը ներկայացրել է Հայիթիի կանանցից մեկի օրինակը. 20-ամյա կինը, ով գտնվում է հղիության չորրորդ ամսում, իր տան ավերումից հետո դիմել է հարևանի օգնությանը, ով ապաստան է տվել նրան և բռնաբարել։
«Մեթյու» փոթորիկը դարձել է վերջին 10 տարում Կարիբյան ավազանում գրանցված ամենաուժեղ փոթորիկը։ Նրան շնորհվել էր հինգերորդ կատեգորիա։ Փոթորկի արագությունը հասել է մինչև 230 կմ/ժամի։
