«Ջավախքն ամբողջապես հայաբնակ հայկական երկրամաս է, որտեղ բնականաբար հայկական հյուպատոսության գործունեությունն անհրաժեշտ է` հայերի և որոշ քանակությամբ Հայաստանի քաղաքացիների շահերը պաշտպանելու համար»,- «Առաջին լրատվականի» հետ զրույցում խոսելով Ջավախքում հայկական հյուպատոսություն բացելու խնդրի վերաբերյալ, կարծիք հայտնեց ԱԺ ՀՀԿ խմբակցության պատգամավոր Շիրակ Թորոսյանը:
Նա հիշեցրեց, որ վերջին անգամ այդ մասին խոսակցություն է բացվել մայիսի 19-ին` ԱԺ-ում բյուջետային կատարողականի լսումների ժամանակ. «Ես բարձրացրի այդ հարցը, որին ի պատասխան ԱԳ փոխնախարար Մանասարյանն ասաց, թե վրացական կողմի հետ բանակցություններ ընթանում են, բայց դա պետք է լինի երկու կողմի փոխադարձ համաձայնությամբ: Այլ կերպ ասած` փոխնախարարն ակնարկեց, որ առայժմ վրացական կողմը դեմ է Ջավախքում հյուպատոսություն բացելուն: Ես վրացական կողմի այս դիրքորոշմանը վաղուց եմ ծանոթ, և դա տեղավորվում է Ջավախքում իրենց իրականացրած քաղաքականության հետ»:
Թորոսյանը նկատեց, որ բացի հյուպատոսությունից, անհրաժեշտ է նաև հայ առաքելական եկեղեցուն իրավական կարգավիճակ տալ և լուծել ջավախահայության մեջ ծառացած այլ խնդիրները:
Խոսելով ադրբեջանական կողմի այն արձագանքի մասին, թե եթե Ջավախքում հյուպատոսություն բացվի, իրենք էլ կպահանջեն Բորչալուում հյուպատոսություն բացել, Թորոսյանը նկատեց, որ ոչ միայն այս հարցում, այլ ընդհանրապես նրանք վրացական կողմին մշտապես հորդորում են ավելի անհանդուրժողական լինել ջավախահայերի նկատմամբ. «Նրանք անընդհատ վրացիներին սարսափեցնում են Ղարաբաղի և հայերի ապստամբական ուրվականով, մինչդեռ սա ընդհանրապես իրականությանը չի համապատասխանում և Ջավախքում ընդհանրապես գոյություն չունի անջատողականություն, ժողովուրդն ընդամենը պայքարում է իր առօրեական իրավունքների պաշտպանության համար»:
Թորոսյանը նշեց, որ չնայած Վրաստանը համարվում է Հայաստանի գործընկերն ու բարեկամը, սակայն Ջավախքում իրականացվող վրացական քաղաքականությունը ուրիշ բան չէ, եթե ոչ հակահայկականություն:
