«Շիրակ» – «Գանձասար» խաղից հետո Վարդան Բիչախչյանը խոսեց լրագրողների հետ:
Գնահատեք թիմի խաղը: Կարծես թե տղաները իրենց նման չէին ու իրենց բնորոշ խաղը չէին ցուցադրում:
Համաձայն եմ, ճիշտ եք նկատել, բացակայում էր կոնցենտրացիան, համագործակցությունը, չկար նվիրվածություն, որ ցույց էր տվել վերջին խաղերում: Ինչքան հորդորեցինք, որ սա առաջնության մեկնարկ է, նոր առաջնություն է, ու բացարձակ նշանակություն չուներ նախորդ խաղերոմ ցուցադրած խաղը, ու շատ կարևոր էր լավ մեկնարկել, տղաները չկարողացան հոգեբանորեն պատրաստվել:
Սակայն հենց առաջին խաղակեսում ձախողեցինք խաղը: Չկատարեցինք առաջադրանքը, բացակայում էր զգոնությունը, առաջին գոլն էլ ստանդարտից բաց թողեցինք: Շրջադարձային պահը երկրորդ գոլի պահն էր, որտեղ մենք տարրական ու կոպիտ սխալ թույլ տվեցինք: Խաղում են սուլիչից սուլիս, ու եթե չկա սուլիչ, պետք է շարունակել: Մրցավարը չսուլեց, բայց տղաները կանգնեցին, իսկ մրցակիցը գոլ խփեց:
Մրցավարության մասին ի՞նչ կասեք:
Չեմ մեկնաբանի մրցավարությունը, բացի այդ էլ կողմնակալ գործողություններ չնկատեցի: Զգոնությունը կորցնելուց պատժվում ես:
Երկրորդ խաղակեսի մասին.
Երկրորդ խաղակեսում քիչ թե շատ կարգավորեցինք խաղը, պետք է մեծացնեինք ճնշումը մրցակցի դարպասի մոտ, ինչի արդյունքում պաշտպանությունում բացեր ունեցանք, ու մրցակիցն էլ ընտրել էր հակագրոհների մարտավարությունը: Արդյունքում պարտվեցինք, բայց նշեմ, որ մրցակիցը շատ ուժեղ էր ու արժանի էր հաղթանակի, ինչի համար էլ շնորհավորում եմ նրանց: Նրանք մեզ գերազանցեցին իրենց նվիրվածությամբ ու ցանկությամբ:
