«Մենք արդեն արել ենք այն, ինչ կարողացել ենք հայ-թուրքական հարաբերությունների, բարեկամության ձևավորման համար, պատրաստ ենք եղել զիջել հնարավոր առավելագույնը, բայց եթե թուրքերն ի զորու չեն շարունակել երկխոսությունը առողջ տրամաբանության շրջանակներում և շարունակում են ավագ «պարտնյորի» դիրքերից հանդես գալ, մենք այլևս փոխզիջումների պատրաստ չենք, մենք է՛լ զիջելու բան չունենք»,- «Առաջին լրատվականի» հետ զրույցում ասաց ՀՀԿ-ական պատգամավոր Շիրակ Թորոսյանը։
Վերջինիս խնդրել էինք անդրադառնալ Թուրքիայի վարչապետի՝ երեկ Կարսում հայ-թուրքական հարաբերությունների վերաբերյալ արած հայտարարությանը, այդ կապակցությամբ Հայաստանի անելիքներին ու պատասխանին։ Հիշեցնենք, որ Ռեջեփ Թայիփ Էրդողանն ասել էր, որ Թուրքիան Ադրբեջանի և Նախիջևանի հետ հավերժ եղբայրներ են, և իրենք հաշտեցման ձեռք արդեն մեկնել են Հայաստանին, հիմա քայլ անելու հերթը Հայաստանինն է։
Ըստ Շիրակ Թորոսյանի` չնայած թուրքերը ամեն օր իրավիճակային, ակադեմիական բնույթի հայտարարություններ են անում, սակայն իրականում չեն փոխվել և «փորձում են ապացուցել, որ թուրքական գենը հայկականի հետ համատեղելի չէ»։ «Իրենք պատկերացնում են ավագ և կրտսեր գործընկերների հարաբերություն, այսինքն՝ նրանք ասում են` մենք կատարում ենք, մենք ասելու իրավունք չունենք»,- նշեց պատգամավորը և հայտարարեց. «Կա՛մ թուրքական կողմը կգնա առողջ տրամաբանության ջրջանակներում քաղաքականություն իրականացնելուն, կա՛մ էլ Հայաստանին մեկնած ձեռքը օդում կմնա, և կա՛մ էլ այսպես կարող ենք շարունակել հավերժ. շրջափակմանն էլ կդիմանանք, ինչպես որ 20 տարի է` դիմանում ենք ցանկացած բանի, բայց մեր ազգային գերխնդիրները հանուն Թուրքիայի հետ սահմանի բացման չենք զոհաբերի»։