Ավան և Նոր Նորք վարչական շրջանների ընդհանուր իրավասության դատարանում դարձյալ հետաձգվեց Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատական քննությունը:
Կուրսանտներ Գնել Թևոսյանին, Նորիկ Սահակյանին, Վաչե Սահակյանին ու Մովսես Ազարյանին մեղադրանք է առաջադրված այն բանի համար, որ 2015 թվականի հունվարի 29-ի գիշերը՝ ժամը 2-ից 3-ի սահմաններում, գումարտակի թիվ 408 ննջարանում առանձին դաժանությամբ, խուլիգանական դրդումներով սպանել են կուրսանտ Հայկազ Բարսեղյանին: Սպանությունից հետո տուժողի մարմինը կախվել է մարզահրապարակի պտտաձողից՝ ինքնասպանության տպավորություն ստեղծելու համար…
Ամբաստանյալների շարքից առանձին է նստում նաև արգելանքի տակ չգտնվող հինգերորդ ամբաստանյալը՝ Վարազդատ Սաֆարյանը, ով սպանության դրվագով չի մեղադրվում, նա մեղադրվում է Վաչե Սահակյանի, Մովսես Ազարյանի հետ միասին ԶՈւ ներքին ծառայության կանոնագրքի կանոնները խախտելու, տարբեր դրվագներով կուրսանտներ Տիգրան Մանասերյանին ու Արտուշ Սիմոնյանին ծեծի ենթարկելու համար:
Դատական նիստի սկզբում դահլիճ չբերվեցին երկու ամբաստանյալները՝ Նորիկ և Վաչե Սահակյանները:
Նախագահողը հայտնեց, որ նրանց առողջական վիճակի վատացման հետ կապված՝ դատարան է հրավիրվել շտապօգնություն:
Նիստը հետաձգվեց՝ մինչև բժշկական տեղեկանքի ստացումը:
Րոպեներ անց նիստը վերսկսվեց:
Նախագահողն ընթերցեց բժիշկ Առաքելյանի տեղեկանքը, համաձայն որի՝ Նորիկ Սահակյանի ճնշումը արձանագրվել է 150/90, նրա մոտ առկա են ստամոքսի խանգարման նշաններ, սակայն դատարանային պայմաններում անհրաժեշտ բուժօգնություն ցուցաբերել, ստամոքսի լվացում կատարել հնարավոր չէ: Ըստ տեղեկանքի՝ Նորիկ Սահակյանն ունի հիվանդանոցային պայմաններում հետազոտման ու բուժօգնություն ստանալու կարիք:
Վաչե Սահակյանի վերաբերյալ տվյալներն այսպիսին էին. ճնշումը՝ 130/85, դարձյալ՝ ստամոքսի խանգարման նշաններ ու նորից եզրահանգում՝ տեղում պայմաններ չկան անհրաժեշտ բուժօգնություն ցուցաբերելու համար:
Երկու ամբաստանյալներն այդպես էլ չներկայացան դատարանի դահլիճ: Նրանց բացակայությամբ նիստը շարունակվել չէր կարող ու հետաձգվեց ևս մեկ անգամ:
Մինչև հետաձգումը պարզ դարձավ, որ հաջորդ նիստից կարող է ներգրավվել նոր փաստաբան՝ ամբաստանյալ Վարազդատ Սաֆարյանի շահերը կպաշտպանի փաստաբան Ինգա Ավագյանը, ում նախագահողն առաջարկեց անհրաժեշտության դեպքում մինչև հաջորդ դատական նիստը ծանոթանալ գործի նյութերին:
Փաստաբան Արա Զաքարյանը տեղեկացրեց, որ նախորդ նիստին չէր ներկայացել առողջական վիճակի վատացման պատճառով, բայց փաստաբանի բացատրությունը դատարանը կլսի հաջորդ դատական նիստին:
