Գերմանիայի սահմանադրական պահպանման հարցերով դաշնային գերատեսչությունը, որը կատարում է հակահետախուզական գործառույթներ, կարծում է, որ Մոսուլի ազատագրումը ԴԱԻՇ-ի ահաբեկիչներից, ինչպես նաև Իրաքում ու Սիրիայում իսլամիստների հետագա պարտությունները կարող են Եվրոպայում ահաբեկչությունների պատճառ դառնալ։ Այս մասին Deutschlandfunk ռադիոկայանի եթերում հայտարարել է այդ գերատեսչության ղեկավար Հանս-Գեորգ Մաասենը։
Քրեական գործերով դաշնային վարչության վերջին տվյալների համաձայն՝ 2016 թվականին Գերմանիայի հատուկծառայությունների ուշադրության կենտրոնում են գտնվել մոտ 450 իսլամիստներ, որոնցից պոտենցիալ ահաբեկչական սպառնալիք է գալիս։ Վերջին 15 տարում իրավապահ մարմիններին հաջողվել է կանխել երկրի տարածքում պատրաստվող 11 ահաբեկչություն։
