Ստամբուլի հայկական «Ակօս» թերթի փոխանցմամբ՝ Պոլսո Հայոց պատրիարք Մեսրոպ II Մութաֆյանը պաշտոնաթող է արվել։ Համապատասխան որոշումը կայացրել է Պոլսո Հայոց պատրիարքարանի հոգևոր խորհուրդը, որի նիստը նախագահել է եպիսկոպոս Սահակ Մաշալյանը։
Հաղորդվում է, որ Մութաֆյանը ծանր հիվանդության պատճառով արդեն 7 տարի է, ինչ չի կարողանում կատարել իր գործառույթները և եկեղեցական օրենքների համաձայն՝ որոշվել է պաշտոնաթող անել նրան և սկսել պատրիարք ընտրելու գործընթաց։
Նիստում հաշվի է առնվել, որ չկան Մութաֆյանի առողջական վիճակի բարելավման մասին լավատեսական կանխատեսումներ։ Մութաֆյանն իր գործառույթները չի կարողացել կատարել 2008 թվականից։
2010 թվականի հունիսի 29-ին թուրքական պետությունը թույլատրել է ընտրել Պոլսո Հայոց պատրիարքի փոխանորդ և արդեն հաջորդ օրը՝ հունիսի 30-ին, այդ պաշտոնում ընտրվել է Արամ արքեպիսկոպոս Աթեշյանը։
Դրանից հետո շարունակ քննարկումներ են ծավալվել պատրիարքի ընտրություններ անցկացնելու համար, սակայն դրանք հաջողության չեն հասել։ Աթեշյանը «Ակօս»-ի հետ զրույցում հայտարարել է, որ իրենք դիմելու են իշխանություններին պատրիարքի ընտրությունները թույլատրելու համար։
Աթեշյանն ընդգծել է, որ հայտնի չէ, թե երբ կստացվի թույլտվությունը, որի համար կարող է պահանջվել մեկ կամ երեք ամիս։ Սահակ Մաշալյանն իր հերթին հայտարարել է, որ ընտրությունների անցկացման թույլտվության համար դիմելու են նոյեմբերին։
