Սիլվիո Բեռլուսկոնիի դատավճիռը՝ նրան պատկանող Mediaset ընկերության ֆինանսական մեքենայությունների գործով, որը վճռաբեկ դատարանի կողմից հաստատվել է օգոստոսի 1-ին, նախկին վարչապետին պաշտոնապես հանձնվել է Գրացիոլիի պալատում:
«Այդ որոշումը ոչ մի հիմք չունի: Դրա միակ նպատակն ինձ իտալական քաղաքականության թատերաբեմից հեռացնելն է»,- ասել է Բեռլուսկոնին:
Իսկ «Ազատության ժողովուրդ» կուսակցության առաջնորդներից մեկը՝ փոխվարչապետ Անջելինո Ալֆանոն, համերաշխություն է հայտնել Բեռլուսկոնիին և հայտարարել իր զբաղեցրած պաշտոնները լքելու պատրաստակամության մասին:
Նշենք, որ Իտալիայի կառավարության գործառույթներն իրականացնում է աջակենտրոնների և ձախակենտրոնների կոալիցիան: Ըստ դիտորդների՝ մի շարք աջակենտրոն նախարարների հրաժարականը կարող է հանգեցնել կառավարական ճգնաժամի և արտահերթ խորհրդարանական ընտրությունների:
Հենց դա էլ Բեռլուսկոնիի նպատակն է:
«Մենք պետք է հնարավորինս շուտ դնենք արտահերթ խորհրդարանական ընտրությունների հարցը՝ դրանցում հաղթելու նպատակով: Եվ մենք այդ նպատակին հասնելու լավագույն միջոցը պետք է ընտրենք»,- ասել է նախկին վարչապետը:
