ՀԱԿ-ը հաղորդագրություն է տարածել, ըստ որի՝ 2017-ին մասնակցելու է խորհրդարանական ընտրություններին և նպատակը իշխանափոխություն իրականացնելն է: Այս հայտարարության վերաբերյալ «Առաջին լրատվական»-ի հետ զրույցում ԱԺ ՀՀԿ խմբակցության քարտուղար Գագիկ Մելիքյանը նշեց. «Ես ողջունում եմ այդ հայտարարությունը, սա առաջին հայտարարությունը չէ, որ տարածում է ՀԱԿ-ը, նմանատիպ հայտարարություններ եղել են նաև նախորդ համապետական ընտրությունների և ՏԻՄ ընտրությունների ժամանակ: Կարծում եմ՝ Գյումրիի և Վանաձորի փորձը ՀԱԿ-ի համար պետք է լուրջ դատողությունների առիթ հանդիսանա, երբ որ այդ քաղաքական ուժը անգամ անվավեր քվեաթերթիկների չափ ձայներ չկարողացավ հավաքել: Գյումրին և Վանաձորը հայտնի են ընդդիմադիր հայացքներով, այդ տարածքներում նման փոքր քանակի ձայներ հավաքելը տվյալ քաղաքական ուժի համար լուրջ գնահատական է և լուրջ մտահոգությունների տեղիք պետք է տա»:
Անդրադառնալով հարցին, թե կա արդյոք քաղաքական դաշտում որևէ ուժ, որը ՀՀԿ-ի համար վտանգ է ներկայցնում, Գ. Մելիքյանը պատասխանեց. «Քաղաքական դաշտում կան քաղաքական ուժեր, որոնք մեզ համար մրցակիցներ են»:
Գ. Մելիքյանի գնահատմամբ՝ «Սասնա ծռեր»- ի գործողություններն ահաբեկչություն էին, ինչը դատապարտելի է. «Այն բարեփոխումները, որի մասին մենք հայտարարում ենք, «Սասնա ծռեր»- ի գործողություններով և ապրիլյան պատերազմով ոչ թե արագացվեցին, այլ հետաձգվեցին, դրանք դրական առումով որևէ ազդեցություն չէին կարող ունենալ»:
Գ. Մելիքյանի դիտարկմամբ՝ նոր կառավարության կողմից առաջ քաշված ծրագիրն իրատեսական է, և ՀՀԿ-ն, որպես քաղաքական ուժ պատասխանատու է և ամեն ինչ պետք է անի՝ աջակցելու, որպեսզի իրականացվեն ծրագրի կարևորագույն դրույթները: Նա հույս հայտնեց, որ կարճ ժամանակում տեսանելի արդյունքներ կապահովվեն:
Գագիկ Մելիքյանը կառավարության շարունակվող փոփոխություններին անդրադառնալով՝ նշեց, որ կադրային փոփոխությունները ՊԵԿ-ում կամայական որոշման հետևանք չեն, այլ վկայում են այն մասին, որ ոլորտում առկա են եղել թերություններ:
Մանրամասները՝ տեսանյութում:
