«Իմ հետ ոչ վարչապետը, ոչ նախարարը, ոչ նախագահը փայատեր չեն, ոչ էլ իրանց հարազատները» (տեսանյութ)

Բնական հյութերի ու պահածոների արտադրությամբ զբաղվող «Եվրոթերմ» ընկերությունը, օգտվելով կառավարության հավանությանն արժանացած ներդրումային ծրագրի շրջանակում ներմուծվող ապրանքների ԱԱՀ-ի վճարումը երեք տարի ժամկետով հետաձգելու արտոնությունից, Արմավիրի մարզի Բաղրամյան շրջանի Վանանդ գյուղի 140 հա տարածքում կառուցել է գյուղմթերքների վերամշակման երկրորդ գործարանը` ներդնելով շուրջ 6.8 մլն ԱՄՆ դոլար: Ինչպես հայտնի է, Արմավիրի մարզի բերքի մեծ մասը այս տարի տուժել է կարկուտից: Օրերս գործարան այցելեց վարչապետ Տիգրան Սարգսյանը` գյուղնախարար Սերգո Կարապետյանի հետ: «Առաջին լրատվական»-ը երեկ զրուցեց «Եվրոթերմի» սեփականատեր Էդուարդ Ղազարյանի հետ:

 – Պարոն Ղազարյան, Ձեր գործարանն այս տարի կարկուտից տուժած ծիրան ընդունե՞լ է, և որքա՞ն գումարով եք ընդունել:

 – 3500 տոննա ընդամենը, 50 դրամով, որը հիմա պառկած է մեր վրա և չգիտեմ` մոտակա 3-4 տարում ես կարո՞ղ եմ վաճառել, հետ բերել միայն ծիրանին վճարած գումարը:

 – Ասել է թե` Դուք անպիտա՞ն բերք եք գնել:

 – Այո՛:

 – Այդ դեպքում ինչո՞ւ եք գնել:

 – Իմ խիղճն ա նման ձևով թելադրել, որովհետև տարածքում ես տեսել եմ գյուղացու վիճակը:

 – Նաև` կառավարությունը խոստացել էր, որ ընկերությունները կգնեն այդ վնասված  ծիրանը:

 – Է, թող գնեին ընկերությունները: Մենք 20 օր մթերել ենք, միայն մենք ենք մթերել, դրա համար կիլոմետրերով հերթ էր առաջացել, և մեզ մեղադրում էին, որ էստեղ հերթ է առաջացել: Ամբողջ Հայաստանի բերքը եկել էր էստեղ, բա պարզ չի, որ հերթ է առաջանալու:

 – Միգուցե հերթի մեջ էր փչանում բերքը:

 – Էդ իրանց խնդիրն ա, մենք ի՞նչ մեղք ունենք էդտեղ: Երկու կգ-անոց կատուն վեց կգ միս միանգամից կուտի՞: Չի ուտի, չէ՞: Բա էս էլ իր սահմանն ունի: Օրական կարող էր մթերել, ասենք, 250 տոննա, 1000 տոննա բերք եկել, կանգնել է, ասում ա` հենց հիմա մթերի, ոնց կմթերես:

 – Ի վերջո` Ձեր կարծիքով, կարողացա՞ք նկատելի օգուտ տալ գյուղացիներին այս տարի:

 – Ես չեմ կարող ասել, որովհետև ինչ էլ անես, մեկ ա` դժգոհ են լինելու: Մենք 3500 տոննա ծիրան մթերել ենք:

 – Պարոն Ղազարյան, իսկ այս գործարանի կառուցման համար որքա՞ն գումար է ծախսվել:

 – Որոշակի, որոշակի գումար:

 – Ինչպե՞ս եք գնահատում գործարար միջավայրը, գործարար հնարավորությունները Հայաստանում:

 – Ես էդ մասին ոչ մի բան չեմ կարող ասել, ես կարող եմ մենակ իմ մասին խոսել:

 – Լավ, Ձեր մասին խոսեք, Ձեզ հաջողվո՞ւմ է հաղթահարել այն դժվարությունները, որոնք առկա են:

 – Չհաղթահարվեր, գործարանը տեղում չէր լինի:

 – Փաստորեն, կառավարությունը ընդառաջե՞լ է Ձեզ:

 – Ինչ պարտադիր է կառավարությունն ընդառաջի, որ գործարան կառուցես, ցանկություն ունես, նպատակ ունես, կարող ես գործարանը կառուցել: Իսկ կառավարությունը կընդառաջի կամ չի ընդառաջի, ես չեմ գտնում, որ դա գերխնդիր է կամ ինչ-որ խնդիր է:

 – Սակայն Ձեր գործարանի դեպքում, փաստորեն, ընդառաջում եղել է կառավարության կողմից:

 – Դուք անպայման ինչ-որ մի բան ուզում եք լսեք ի դեմ կառավարության, չեմ ասի, որովհետև ես ոչ տեսել եմ, ոչ էլ նպատակ ունեմ էդ մասին ինչ-որ մի բան հայտարարելու:

 – Թե՞ կաշկանդվում եք գյուղնախարարի ներկայությունից:

 – Նախարարի ներկայությամբ ես նախարարին ինչ որ պետք է` ասում եմ:

 – Մեզ չեք ասում, նախարարի՞ն եք ասում:

 – Բայց ի՞նչ ասեմ ձեզ, ի՞նչ եք ուզում լսեք, վատ բա՞ն, չեմ ասելու:

 – Իսկ ինչո՞ւ հենց Ձեր ընկերությանը տրվեց այդ արտոնությունը:

 – Բոլոր ընկերություններին, որոնք ունեն էդ ծավալի ներդրում, երկարացվում է իրենց ավելացված արժեքի հարկը երեք տարով: …Իմ հետ ոչ վարչապետը, ոչ նախարարը, ոչ նախագահը փայատեր չեն, ոչ էլ իրանց հարազատները: