Կառավարության ծրագրի ներկայացման ժամանակ վարչապետ Կարեն Կարապետյանը հանդես եկավ ելույթով՝ հայտարարեց, որ խաղի նոր կանոններ են գործելու: «Ժառանգություն» խմբակցության պատգամավոր Զարուհի Փոստանջյանն «Առաջին լրատվական»- ի հետ զրույցում կարծիք հայտնեց, որ խաղի նոր կանոնների մասին խոսք լինել չի կարող:
«Եթե դու չես առաջարկում համակարգային փոփոխությունների ծրագիր, այլ ուղղակի հին համակարգի թեթև փոփոխություն ես առաջարկում, որպեսզի կարողանաս ինչ-որ չափով արդիականացնել հին համակարգը, որը գործում է, ապա դա չի կարող հանգեցնել փոփոխությունների, որոնք բերելու քաղաքական համերաշխության, հետևաբար փոփոխություններ ակնկալելն անիմաստ է: Այս 6 ամիսը ևս կորցված ժամանակ է լինելու»,- նշեց Զ. Փոստանջյանը:
Այդ ժամանակահատվածում, ըստ Զ. Փոստանջյանի, չի բացառվում, որ կլինեն ցնցումներ, որոնք կվերածվեն քաոսի:
Անդրադառնալով դիտարկմանը, որ վարչապետը մի քանի ՀԸ-ներին տված հարցազրույցում խոսել է ներդրումային ծրագրերից և նշել է, որ եթե ծրագրերը չիրականանան, եթե իրեն չհաջողվի փոփոխությունները կյանքի կոչել, նա որևէ վայրկյան չի մնա այս պաշտոնում, Զ. Փոստանջյանը նշեց. «Հարցազրույցը ընտրված լրատվամիջոցների հետ անցկացնելն արդեն խոսում է ավտորիտար բնույթի մասին, և վկայում է այն մասին, որ ինքը նշանակված անձ է և խնդիր ունի իրեն ապահովագրելու անցանկալի և անկանխատեսելի հարցերից: Մենք չպետք է խաբվենք այսպիսի հայտարարություններին, շատ են եղել նման հայտարարություններ, և ձախողումների համար ոչ ոք պատասխանատվություն չի կրել: Երբ վարչապետները հրաժական են տվել, նրանցից ոչ ոք հաշվետվություն չի պահանջել»:
Մանրամասները՝ տեսանյութում:
