Կառավարության նիստից հետո լրագրողների հետ զրույցում ՀՀ բնապահպանության նախարար Արծվիկ Մինասյանը պատասխանելով հարցին, թե ինչ առաջնահերթություններ կան բնապահպանության ոլորտում, որոնք տեղ են գտել նոր կառավարության ծրագրում, նշեց` շրջակա միջավայրը դիտարկել որպես կապիտալ, ինքնին արժեք ունեցող:«Մինչ այժմ միջազգային մակարդակում շրջակա միջավայրը դիտարկվել է որպես ռեսուրս, որը պետք է վերափոխվի, որպեսզի ստեղծվի նոր արժեք»,- ասաց նախարարը` հավելելով, որ պետք է վերանայել մի շարք ծրագրեր, այդ թվում` մի շարք տնտեսական ծրագրեր, որոնց հիմքում պետք է լինի շրջակա միջավայրը` որպես կապիտալ ունեցող ռեսուրս, այլ ոչ թե այն վերացնելը կամ ոչ արդյունավետ օգտագործելը: Մինասյանը նշեց, որ միջազգային կառույցներն առաջիկայում ակտիվորեն կներգրավվեն մեր երկրում շրջակա միջավայրի և բնապահպանական քաղաքականության արդյունավետ իրականցման գործում:
Մյուս կարևոր հարցը, ըստ նախարարի, վերաբերում էր էկոլոգիական քաղաքականությանը` որպես համակարգային նոր օրենսդրության ձևավորմանը: «Մենք առաջարկում ենք ձևավորել էկոպիտակավորման համակարգ, որը մի կողմից կլինի կամավոր տնտեսվարողների ու արտադրողների համար, մյուս կողմից պարտադրող` հակառակ գործողություններ կատարողների նկատմամբ, որպեսզի թե էկոլոգիական շահ հետապնդվի, պաշտպանվեն թե՛ սպառողների շահերը, թ՛ե տնտեսվարողների շահերը և ապահովվի նրանց մրցունակությունը»,- նշեց նախարարը:
Կառավարության ծրագրում ներառված են նաև էկոտուրիզմը, հողային ռեսուրսների պաշտպանությունը, բուսական, կենդանական աշխարհը` որպես հիմնական հարստություն ընկալելու, կենսաբազմազանության հետազոտական աշխատանքները և այլն: Ընդերքի շահագործման մասով պետք է ճիշտ գնահատվի էկոլոգիական ու տնտեսական արժեքը` այն համադրելով այլընտրանքային ծրագրերի հետ:
Անդրադառնալով դիտարկմանը, որ սուպերմարկետներում տոպրակները վաճառվում են և դա բողոքներ է առաջացրել հասարակության շրջանում, նախարարը նշեց, որ տոպրակների վաճառքը ոչ թե բիզնես նպատակ է հետապնդում, այլ հակառակը՝ առաջին նպատակն է բեռնվածություն ապահովել, որ տնտեսվարողները գնան էկոլոգիապես մաքուր տոպրակների արտադրմանը, և հաջորդ նպատակը` դրանով նվազեցվում է շրջակա միջավայրի վրա բացասական ազդեցությունը:
Մանրամասները՝ տեսանյութում:
