Մարդու իրավունքների պաշտպան Արման Թաթոյանն այսօր հանդիպել է Հայաստանում ԱՄՆ Միջազգային զարգացման գործակալության տնօրեն Դեբորա Գրիզերի հետ. տեղեկացնում է ՀՀ մարդու իրավունքների պաշտպանի աշխատակազմը։
Հանդիպման ընթացքում ներկայացվել են Պաշտպանի աշխատակազմի գործունեության ընդհանուր նկարագիրը, Պաշտպանի աշխատակազմի մարզային ստորաբաժանումների ընդլայնման ծրագրերը, ինչպես նաև միջազգային մի շարք կառույցների հետ համագործակցության հիմնական ուղղություններն ու հեռանկարները:
Քննարկվել են նաև ընտանեկան բռնության կանխարգելման, փախստականների, երեխաների իրավունքների և գործարարների շահերի պաշտպանության հետ կապված հարցեր:
Արման Թաթոյանը բարձր է գնահատել Հայաստանում ԱՄՆ Միջազգային զարգացման գործակալության դերն ու իրականացրած աշխատանքները, ինչպես նաև հայտնել է մարդու իրավունքների պաշտպանության ոլորտում համատեղ ծրագրեր նախաձեռնելու և փոխգործակցելու իր պատրաստակամությունը:
