Ադրբեջանական Salam News գործակալության փոխանցմամբ, Ադրբեջանի արտգործնախարար Էլմար Մամեդյարովը հայտարարել է, որ իրենք ցանկանում են, որպեսզի սկզբնական շրջանում հայկական զորքերի դուրսբերման գերծընթացը սկսվի Ֆիզուլու ու Աղդամի (Ակն) շրջաններից, ապա նաև մնացած 5 շրջաններից.
«Շփման գծից դիպուկահարների հետքաշումը պետք է դիտարկվի «օկուպացված» շրջաններից հայկական զորքերի դուրսբերման համատեքստում: Հայերն ասում են դիպուկահարներին հանեք: Դա «ծիծաղ է առաջացնում»: Գլխավոր հարցը հայկական զորքերի առկայությունն է Ադրբեջանի «օկուպացված» տարածքներում:
Մենք պետք է հասնենք, որոշակի գրաֆիկով հայկական զորքերի դուրսբերմանը: Եվ այդ գործընթացը պետք է սկսել Ֆիզուլու ու Աղդամի շրջաններից: Դա մեր դիրքորոշումն է:
Մյուս տարբերակի համաձայն` հայկական զորքերը պետք է միաժամանակ լքեն «օկուպացված» 5 շրջանները: Այսինքն` տարբերակները շատ են»:
Հիշեցնենք, որ ապրիլի սկզբին Թուրքիայի արտգործնախարար Ահմեդ Դավութօղլուն հայտարարել էր. «Թուրքիան Հայաստանի հետ հարաբերությունները բարելավելու համար չի կարող կորցնել Ադրբեջանին: Մենք Հայաստանի նախագահ Սերժ Սարգսյանին ու իմ հայ գործընկեր Էդվարդ Նալբանդյանին հայտնել ենք 1-2 շրջան Ադրբեջանին վերադարձնելու մեր ցանկության մասին:
Ադրբեջանին գոհացնելու համար Հայաստանը կարող է նրան զիջել Ֆիզուլու և Աղդամի շրջանները: Այդպիսի իրավիճակում Ադրբեջանն էլ «պատրաստ կլինի» սահմանի բացմանը: Սակայն Հայաստանը դա մերժեց»:
