Ոչ ալկոհոլային ըմպելիքներ արտադրող PepsiCo-ն հայտարարել է իր արտադրանքում շաքարի պարունակությունը նվազեցնելու մտադրության մասին։ Հաղորդվում է, որ 2025 թվականին ըմպելիքների 2/3-ը 12 ունցիայում (0.36 լիտր) կպարունակեն 100 կալորիայից ոչ ավելի շաքար։ Այս մասին հայտնում է BBC-ն։
Այժմ նման պայմանով է արտադրվում ընկերության ըմպելիքների 40 տոկոսը։
PepsiCo-ն ու Coca-Cola-ն գտնվում են բժիշկների ու իշխանությունների մշտական ճնշման ներքո, քանի որ դրանք մասամբ պատասխանատու են համարվում դիաբետով հիվանդացությունների աճի և ճարպակալման դեպքերի համար։
0.33 լիտրանոց Coca-Cola-ի տարայում պարունակվում է 35 գրամ շաքարավազ (մոտ 135 կալորիա)։
ԱՀԿ-ն հոկտեմբերին պահանջել էր հարկ սահմանել քաղցր գազավորված ըմպելիքների վրա՝ նվազեցնելու համար այդպիսի ըմպելիքների սպառումը։ ԱՀԿ տվյալներով՝ գազավորված ըմպելիքի վաճառքը կնվազի, եթե սահմանվի առնվազն 20 տոկոսի հարկ:
