ԴԱԻՇ ահաբեկչական խմբավորման քարոզչությունը, որի շնորհիվ խմբավորումը նորանոր մարդկանց է հավաքագրում իր շարքերը, վերջին տարում զգալիորեն թուլացել է: Այս մասին են վկայում ԱՄՆ ռազմական ակադեմիային (Վեստ Փոյնթ) կից Ահաբեկչության դեմ պայքարի կենտրոնի հետազոտության արդյունքները։
«Բացի արտադրանքի բազմազանությունից, որը տարածում է խմբավորումը, խոսքը նաև դրա մեծ քանակի մասին է։ Այդուհանդերձ, չնայած այն բանին, որ պիկին (2015-ի օգոստոս) ԴԱԻՇ-ը տարածել է ավելի քան 700 մեդիա-հաղորդագրություն, դրանց թիվը 2016-ի օգոստոսին կազմել է 200»,- ասվում է զեկույցում։
Հատկապես տուժել են այն քարոզչական տեսանյութերը, որոնցում ԴԱԻՇ-ը ներկայացվել է որպես հաջող գործող «խալիֆայություն»։ Մեծացել է տեսանյութերի թիվը, որոնցում ահաբեկիչները մահապատժի են ենթարկում լրտեսության մեջ մեղադրվող մարդկանց։ Դա, ինչպես կարծում են հեղինակները, վկայում է ահաբեկիչների ղեկավարության աճող պարանոյայի մասին։
Հետազոտողների կարծիքով՝ ահաբեկիչները ստիպված են կրճատել քարոզչությունը հակաահաբեկչական ճնշման պատճառով։
Հետազոտության հեղինակներն ուսումնասիրել են մոտ 9000 միավոր մեդիա-կոնտենտ՝ պատրաստված ԴԱԻՇ-ի քարոզիչների կողմից։ Նրանք փաստում են, որ չնայած մարտի դաշտում կորուստներին՝ ԶԼՄ-ներում ԴԱԻՇ-ի ներկայությունը հաշվվում է ահաբեկիչների կողմից զավթված տարբեր տարածքների մի շարք բյուրոներով և տարբերվում բարձր որակի արտադրանքով։
