«Բանանցի» նախկին գլխավոր մարզիչ Տիտո Ռամալյոն ֆեյսբուքյան գրառման միջոցով հայտնել է երևանյան ակումբից հեռանալու մասին և շնորհակալություն է հայտնել այստեղ աշխատելու ժամանակաշրջանի համար.
«Այսօր, երբ ակումբի հետ ստորգարեցինք բոլոր համապատասխան փաստաթղթերը, կարող եմ պաշտոնապես հայտնել, որ դադարում եմ լինել «Բանանցի» գլխավոր մարզիչը: Ինձ հետ աշխատող մարզչական շտաբը նույնպես դադարեցնում է իր գործունեությունն ակումբում:
Մոտավորապես մեկ տարի առաջ էր, երբ հրավիրվեցի միանալու սպորտային առումով հետաքրքիր, գայթակղիչ և համարձակ մի նախագծի: Այսօր կարող եմ վստահեցնել, որ արժեր այդ ամենի մասը կազմել:
Պետք է շնորհակալություն հայտնեմ շատ մարդկանց, որոնց շնորհիվ այս փորձը դրական հետք է թողել իմ կյանքում: Իհարկե, դժվար է բոլորին մեկ առ մեկ նշել, սակայն կցանկանայի առանձնացնել մի քանիսին՝ ակումբի բաժնետերեր Ջիվան Չելոյանցին և Օլեգ Մկրտչյանին, ինչպես նաև Խուանխո Վիլային, Վալերի Կարպինին, Ռոման Ասխաբաձեին և Հրաչ Աղաբեկյանին: Բնականաբար, չեմ մոռանում նաև Բանանցի ողջ «ընտանիքին», որը մեր հանդեպ միշտ անչափ ուշադիր էր: Հատուկ ջերմությամբ ցանկանում եմ առանձնացնել ակումբի մարզաբազայի ողջ աշխատակազմին, ովքեր օգնում էին մեզ բոլոր հարցերում, ինչի շնորհիվ մեր կյանքը բավականին հեշտացավ:
Շնորհակալություն իմ ֆուտբոլիստներին, հայկական ֆուտբոլին և դրա մասը կազմող հյուրընկալ ու բարեհամբույր մարդկանց:
Եվ վերջում շնորհակալություն եմ հայտնում ինձ ընկերակցող իսպանական մարզչական շտաբի անդամներին՝ Նանդոյին, Լոիսին, Մայկլին, Լուիսին, Պաբլոյին, Կառլոսին և Չիմոյին, որոնք իմ կողքին էին և աշխատում էին հանուն առաջընթացի:
Այժմ ես ցանկանում եմ միայն հաջողություններ մաղթել «Բանանցին» և դրա մասը կազմող բոլոր մարդկանց: Ինձ համար մեծ հաճույք էր լինել այս ակումբի անդամը:
Եվ իհարկե, երբ կյանքում մի փուլն ավարտվում է, սկսվում է մեկ ուրիշը…»,- նշել է իսպանացի մասնագետը:
Հիշեցնենք, որ Տիտո Ռամալյոն որպես «Բանանցի» գլխավոր մարզչի պաշտոնոմ աշխատեց 2015 թվականի հոկտեմբերից մինչև 2016 թվականի հոկտեմբեր ընկած ժամանակահատվածում:
