Դերասանուհի Ջենիֆեր Էնիսթոնը մրցանակ կստանա Guy’s Choice Awards («Տղաների մրցանակ») մրցանակաբաշխության ժամանակ` «Սեքսուալության 10 տարի» անվանակարգում: Այս մասին գրում է New York Daily News-ը: Մրցանակների հանձնման արարողությունը կկայանա հունիսի 10-ին:
Guy’s Choice Awards մրցանակի հիմնադիր Spike հեռուստաալիքի ներկայացուցիչ Քեյսի Պատերսոնն ասել է, որ այս մրցանակի հանձնումը Էնիսթոնին տղամարդկանց կողմից քնքշության արտահայտություն է: Նա կարծիք է հայտնել, որ Էնիսթոնը դուր է գալիս տղամարդկանց, քանի որ համադրում է իր մեջ սեքսուալությունն ու հումորի զգացումը: «Յուրաքանչյուր ոք կցանկանար, որ նրա պես կինն ապրեր հարևանությամբ»,- ասել է Պատերսոնը:
Այս մրցանակը հիմնադրվել է 2007 թ.: «Սեքսուալության 10 տարի» անվանակարգում նախորդ տարիներին մրցանակների են արժանացել Քեմերոն Դիասը (2008), Հելլի Բերրին (2009) և Շարլիզ Թերոնը (2010):
