«Հայերն ուշադիր հետևում են խորհրդարանում իմ գործողություններին», – ասել է Կարո Փայլանը:
Թուրքիայի խորհրդարանի հայազգի պատգամավոր Կարո Փայլանին ԱՄՆ-ի հայ համայնքը դիմավորել է ջերմ ողջույններով և հոտնկայս ծափահարություններով: Ինքը՝ Փայլանը, «Ամերիկայի Ձայն»-ին պատմել է, որ Միացյալ Նահանգներ էր ժամանել ոչ միայն Թուրքիայի իրավիճակի վերաբերյալ իր տեսակետը հաղորդելու, այլև Արևմուտքի տեսակետին ծանոթանալու նպատակով.
«Իշխանության ղեկը ստանձնելուց հետո, Էրդողանը կոռուպցիայի խորացման և այլ խնդիրների տեղիք տվեց, որից հետո նա որոշեց բարձրացնել ազգայնականության ալիքը և դրա տակ ծածկել բոլոր խնդիրները:
Արևմուտքն իր կողմից այժմ առաջնորդվում է այն գաղափարով, որ Արևմուտքի և Արևելքի միջև բաժանարար սահման կա, անվանենք այն քրիստոնյա աշխարհ և մահմեդական աշխարհ: 10 տարի առաջ Արևմուտքում հավատում էին, որ մահմեդական աշխարհում նույնպես կարող են ժողովրդավար երկրներ լինել, և Թուրքիան նման երկիր դառնալու թեկնածուն էր: Սակայն, մեր օրերում, ինչպես ես տեսնում եմ Վաշինգտոնում ոչ ոք այլևս չի կարծում, որ Թուրքիան կարող է ժողովրդավար երկիր դառնալ: Փոխարենը պատրաստ են համագործակցել բռնապետ ղեկավարների հետ: Դա սարսափելի է»:
Ստեղծված պայմաններում պատգամավորի խոսքով՝ հայ-թուրքական հարաբերությունների բարելավման հեռանկարները նույնպես մշուշոտ են.
«Պահպանողական, հին Թուրքիայի գաղափարախոսները չեն ցանկանում որևէ հարաբերություններ հաստատել Հայաստանի հետ:
Նրանք ընդամենը ցանկանում են Հայաստանը դիտարկել որպես սպառնալիք կամ չարիք: Թուրքիան նաև հայոց սփյուռքն է ներկայացնում որպես չարիք: Այսպիսով, հին Թուրքիայի պայմաններում, որի պատանդն է դարձել նաև Էրդողանը, հնարավոր չէ հայ-թուրքական հարաբերությունների բարելավում»:
Կարո Փայլանի կարծիքով՝ ելքն Արևմուտքի աջակցությունն է Թուրքիայի դեմոկրատական ուժերին.
«Մենք միամիտ և ռոմանտիկ դեմոկրատներ ենք: Մենք Արևմուտքի, ամբողջ մարդկության աջակցության կարիքն ունենք: Եթե մենք մեր նպատակներին չհասնենք, ապա կդառնանք երրորդ աշխարհի երկիր: Թուրքիան Եվրամիության անդամակցության երբեմնի թեկնածու էր, իսկ այժմ անճանաչելի հեռացել է այդ գաղափարից: Եւ եթե համաշխարհային հանրություն ուզում է, որ մահմեդական աշխարհում լինի ժողովրդավար երկիր, այն պետք է աջակցի Թուրքիայի դեմոկրատներին»:
Կարո Փայլանը նաև հատուկ դիմել է Հայաստանի և սփյուռքի հայերին.
«Հիշենք, որ Թուրքիան նաև մեր հողն է և Թուրքիան ժողովրդավար երկիր դարձնելը մասամբ նաև բոլոր հայերի պատասխանատվությունն է: Անշուշտ, մենք ցեղասպանություն ենք վերապրել, և հարյուր տարի մեր վերքը դեռևս չի ապաքինվել: Այն բուժելու բանալին Թուրքիայում է»:
