Ռուսական RIA Novosti լրատվական գործակալության փոխանցմամբ՝ Թուրքիայի ԱԳՆ-ն հայտարարություն է տարածել, որում ափսոսանք է հայտնել Ղրիմի թաթարների մեջլիսի գործունեությունն արգելելու մասին ՌԴ Գերագույն դատարանի ընդունած որոշման կապակցությամբ:
Սեպտեմբերի 29-ին ՌԴ Գերագույն դատարանը օրինական ճանաչեց Ղրիմի թաթարների մեջլիսը ծայրահեղական կազմակերպություն ճանաչելու ու Ռուսաստանում նրա գործունեությունն արգելելու մասին որոշումը:
Թուրքիայի ԱԳՆ-ն իր հայտարարության մեջ հիշեցրել է, որ 2016 թվականի ապրիլի 26-ին պաշտոնապես դատապարտել է Ղրիմի փաստացի վարչակարգի կողմից Ղրիմի թաթարների օրինական ներկայացուցչական մարմնի գործունեության արգելքը. «Մենք ափսոսանքով ընդունեցինք ՌԴ գերագույն դատական մարմնի որոշումը, որը հաստատեց առաջին ատյանի որոշումը»:
Թուրքիայի ԱԳՆ-ն ընդգծել է, որ Ղրիմի թաթարները չեն հետապնդում որևէ այլ նպատակ՝ բացառությամբ ազատ, հանգիստ ու անվտանգ ապրելու, և նրանց հանդեպ նման սահմանափակող մեթոդներն անընդունելի են:
