Ի՞նչ ակնկալիքներ կարող ենք ունենալ նորանշանակ նախարարներից՝ իրենց ոլորտներում ռեալ բարեփոխումներ կիրականացվե՞ն, թե զուտ անձերի փոփոխություն է կատարվել: Այս հարցի շուրջ «Առաջին լրատվական»- ի հետ զրույցում տնտեսագետ Հայկ Բալանյանն նշեց, որ այն մասին, թե կոնկրետ ինչ են անելու նորանշանակ նախարարները, նոր կառավարությունը, կարելի է խոսել միայն համապատասխան ծրագրայի ելույթներ լսելուց հետո: Ըստ տնտեսագետի՝ կատարված փոփոխությունները քաղաքական փոփոխություններ են և կապված են այն ճգնաժամի հետ, որում հայտնվել է ՀՀ-ն:
«Ես համակարգային փոփոխություններ այս կառավարությունից չեմ սպասում, կարծում եմ, որ փորձ է արվելու առավելագույնս բարձրացնել կառավարման արդյունավետությունը, բայց պահպանելով այն քաղաքական իրողությունները, որոնք կան: Սկզբունքային փոփոխություններ այս իշխանությունից չեմ սպասում: Սա մի փորձ է այս իշխանությանը «տյունինգ» անելու՝ չլուծելով գլոբալ խնդիրները, որոնք առկա են Հայաստանում: Մեծ շուքով միայն կիասալուծումներ կիրականացվեն»,- նշեց Հայկ Բալանյանը և հավելեց, որ ՀՀ տնտեսական քաղաքականությունը, պետական բյուջեն ծառայում են քաղաքական հենարանին կերակրելու համար:
Անդրադառնալով դիտարկմանը, որ նորանշանակ նախարարները հանրությանը հայտնի մարդիկ չեն, Հայկ Բալանյանը նշեց, որ պրոֆեսիոնալների կառավարություն է ստեղծվում. «Կ. Կարապետյանը ընդգծեց նրանց հայրենասիրությունը, այսինքն՝ նվիրվածություն, հավատարմություն այն կուսրին, որը կներկայացնի վարչապետը»:
«Այս կառավարությունը քաղաքական հենարան չունի. այս կառավարության քաղաքական հենարանը հենց Սերժ Սարգսյանն է, որը պետք է ասի՝ մի քիչ ավելի շատ պիտի փող մուծեք, ավելի քիչ պիտի գողանաք: Բայց սկզբունքային առումով Ս. Սարգսյանը մեծ փոփոխությունների չի գնա, որովհետև այդ դեպքում կզրկվի քաղաքական հենարանից 2017-ի ընտրություներից առաջ, և դա իր համար կլինի քաղաքական ինքնասպանություն, իսկ Ս. Սարգսյանը բնավ չի ցանկանում զիջել իշխանությունը»,- ընդգծեց տնտեսագետը:
Մանրամասները՝ տեսանյութում: