Վրացական Apsny.ge կայքի փոխանցմամբ, Ռուսաստանը իշխանափոխություն կազմակերպելու համար շարունակում է միլիոնավոր դոլարներ առաքել Վրաստան: Այս անգամ ռուսական հատուկ ծառայությունները և պաշտպանության նախարարության Հարավային ռազմական օկրուգը (ՀՌՕ) 13 միլիոն դոլար են հատկացրել «Ժողովրդավարական շարժում» կուսակցության առաջնորդ Նինո Բուրջանաձեին ու նրա շրջապատին:
Ընդ որում, 7 միլիոն դոլարը հատկացրել են հատուկ ծառայությունները, իսկ 6 միլիոնը` ՀՌՕ-ն: Բուրջանաձեն այդ գումարը ստացել է Վրաստանում կոնկրետ պլան իրագործելու համար, որի կետերում նշված է՝
ա) անկարգությունների կազմակերպման միջոցով իշխանափոխության իրականացում և իշխանության գլուխ գալ,
բ) արտաքին քաղաքականության ուղղվածության կտրուկ փոփոխություն (հյուսիսային ուղղությամբ), առանց հանրաքվե անցկացնելու՝ ՆԱՏՕ-ին ու եվրոպական կառույցներին անդամակցելու հեռանկարից հրաժարում,
գ) Աբխազիայի և Հարավային Օսիայի անկախության ճանաչման նկատմամբ հասարակական կարծիքի նախապատրաստում ապա նաև այդ պետությունների ճանաչում և Վրաստանի կազմ դրանց վերադարձից վերջնական հրաժարում,
դ) նոր իշխանության առանցքային պաշտոններում (հատկապես արտաքին գործերին ու անվտանգությանն առնչվող) Կրեմլի առաջարկած թեկնածուների նշանակում:
Որպեսզի վերոնշյալը գումարն անարգել հասնի Բուրջանաձեին, կիրառվել է վաղուց փորձված սխեմա: Մի քանի ամսվա ընթացքում 13 միլիոն դոլարն աստիճանաբար փոխանցվել է ռուսական հատուկ ծառայությունների վերահսկողության տակ գտնվող եվրոպական մասնավոր կազմակերպությունների հաշվին:
Այնտեղից էլ այդ գումարը ձևակերպվել է Բուրջանաձեի վստահված անձանց անունով և ուղարկվել Թուրքիա, Հայաստան, Ադրբեջան ու Վրաստան:
Վրաստանի ուժային կառույցները դեռ չեն մեկնաբանել այս տեղեկատվությունը:
Հիշեցնենք, որ օրեր առաջ Բուրջանաձեն հայտարարել է, որ մայիսի 21-ին սկսվելիք «Ժողովրդական հավաք» կազմակերպության ակցիաները կարճ ժամանակ անց Վրաստանում կհանգեցնեն իշխանափոխության, և որ այս ամառը վերջինն է լինելու նախագահ Միխեիլ Սաակաշվիլիի համար` ընդգծելով, որ իրենք մտադիր չեն շաբաթներ անցկացնել փողոցներում: