Այսօրվա զորահանդեսին ներկայացված զինտեխնիկա կար, որը ձեռք է բերվել նաև ՌԴ-ից՝ 200 միլիոն ԱՄն դոլար վարկի շրջանակում, կային նաև զինատեսակներ, որոք ձեռք են բերվել ՀՀ-ի միջոցներով: Այս մասին լրագրողների հետ զրույցում ասաց ՀՀ ԶՈՒ գլխավոր շտաբի պետի տեղակալ Մովսես Հակոբյանը: -Ցանկացած զինատեսակ, որը ՀՀ-ն ձեռք է բերում, այն նպատակով է, որ իրականացնի ՀՀ պաշտպանությունը»:
Հարցին՝ ՊՆ-ում կադրային փոփոխություն սպասվո՞ւմ է, մասնավորապես նախարարի փոփոխություն, Մովսես Հակոբյանը պատասխանեց. «Նախարարը քաղաքական պաշտոն է, գիտեք՝ կառավարությունում այսօր պաշտոնակատարներ կան, այդ թվում Պաշտպանության նախարարը, երբ նշանակումները լինեն, հասարակությունը կիմանա»: Դիտարկմանը, որ խոսակցություններ կային Արցախի հերոս Վիտալի Բալասանյանին այդ պաշտոնում նշանակելու մասին, Հակոբյանն ասաց, որ գուշակություններով չի զբաղվում: Հիշեցմանը, որ իր անունն էլ է շրջանառվում, Հակոբյանն ասաց. «Նաև ինձ է վերաբերվում»: Ճշտող հարցին՝նման առաջարկ չի՞ եղել, Մովսես Հակոբյանը բացասական պատասխան տվեց: Այնուամենայնիվ եթե լինի ի՞նչ է պատրաստվում անել, Մ. Հակոբյանն պատասխանեց. «Իմ պատասխանը կտամ այն մարդուն, ով ինձ կառաջարկի»:
Լրագրողները հետաքրքրվեցին նաև ԼՂ-ՀՀ փոխօգնության պայմանագրից, թե ե՞րբ է այն կիրառվելու, Հակոբյանը պատասխանեց. «Այն կիրառվել է դեռևս 1992 թվականին, կիրառվել է այս 25 տարիների մեր նորաստեղծ պատմությունների ընթացքում, այուսհետ ևս կիրառվելու է»:
«Փաստաթղթերին տեղյակ չեմ, բայց մի բան գիտեմ, որ ՀՀ-ն և հայ ժողովուրդն ամբողջությամբ Ղարաբաղի ժողովրդի կողքին են, ԶՈՒ-ն պատասխանատվություն է կրում Ղարաբաղի ժողովրդի անվտանգության համար»,- ընդգծեց Մ. Հակոբյանը:
Մանրամասները՝ տեսանյութում:
