Սեպտեմբերի 18-ին 317 համայքներում ՏԻՄ ընտրություններ են տեղի ունեցել: «Առաջին լրատվական»- ի հետ զրույցում քաղտեխնոլոգ Վիգեն Հակոբյանը կարծիք հայտնեց, որ ոչ իշխանական ուժերի մասնակցությունը ցածր էր, իսկ ՏԻՄ ընտրություններն ապաքաղաքական էին: Քաղտեխնոլոգի խոսքով՝ այս ընտրություններում ընտրակաշառքը կրկին ակտուալ էր:
«Որոշ համայնքներում հաղթեց ոչ իշխանական թեկնածուն, սրանով իշխանությունները փորձեցին ցույց տալ, որ փոփխությունները, որի մասին ազդարարվել է, արդեն սկսվել է՝ նոր դեմքեր են գալիս:
Նախորդ ընտրությունների համեմատությամբ այս անգամ ընդդիմության հետաքրքրվածությունը մեծ էր՝ պայմանավորված նորաստեղծ ընդդիմադիր կուսակցություների խնդիրներով. այսինքն՝ այդ կուսակցությունները շատ լավ հասկանում են, որ խնդիր ունեն իրենց անունը լրացուցիչ անգամ հնչեցնելու, և ընտրությունները դրա համար լավ առիթ են: «Քաղաքացիական պայմանագիր»- ը, «Լուսավոր Հայաստան»- ը և մի շարք այլ կուսակցություններ փորձում են հենց քարոզչության ընթացքում սկսել իրենց հիմնական գործընթացը. սա իրենց համար նախերգանք է խորհրդարանական ընտրություններից առաջ: Իսկ տիտղոսային ընդդիմադիր կուսակցությունները ստիպված են մասնակցել ընտրություններին, քանի որ վախենում են այս արևի տակ իրենց տեղը կորցնել ընդդիմադիր սեգմենտում: Արդեն գաղտնիք չէ, որ մրցակցություն է գնում նաև ընդդիմադիր կուսակցություների միջև»,- նշեց Վիգեն Հակոբյանը:
Անդրադառնալով Ծաղկահովիտ համայնքում Արայիկ Խանդոյանի պարտությանը՝ քաղտեխնոլոգը նշեց, որ իր կարծիքով այստեղ պայքարը ոչ թե քաղաքական էր, այլ սկզբունքային. «Իշխանության համար շատ սկզբունքային էր, որ «Սասնա ծռեր»-ի ներկայացուցիչը պարտվի, իշխանությունը չէր ուզում պարտվել հենց «Սասնա ծռեր»-ին: «Սասնա ծռեր»- ի գոծոնը բավականին ցավագին է ընդունվում իշխանությունների կողմից: Դա նախադեպ է, թե ինչպես կարելի է Հայաստանում իրավիճակ փոխել: Այս պարագայում կար նաև ուժային, ինչ-որ չափով նաև տղայական գործոնը, որ մինչև վերջ պիտի գնան»:
Էջմիածնում կարծեք թե ավանդույթ է դարձել ՏԻՄ ընտրություններից առաջ միջադեպերը, արյունալի դեպքերը, վախի մթնոլորտ ստեղծելը և այս անգամ էլ քաղքապետի թեկնածուների միջև միջադեպ եղավ, կրակոցներ հնչեցին: Այս դիտարկման վերաբերյալ քաղտեխոլոգը նշեց, որ Հայաստանում յուրաքանչյուր համայնք իր առանձնահատկություններն ունի, և նախընտրական շրջանում այդ առանձնահատկությունները դրսևորվում են՝ մի տեղ ծեծկռտուք, մի տեղ քաշքշուկ է լինում, մի տեղ հայհոյում են, Էջմիածնում զենքին տիրապետող և զենքին սովոր մարդկանց թիվը բավականին մեծ է, այնտեղ այդպիսի առանձնահատկությունը կա՝ ուշ թե շուտ կրակում են:
Մանրամասները՝ տեսանյութում
